കൊച്ചി: യുവ രാഷ്ട്രീയ നേതാവ് അശ്ലീല സന്ദേശങ്ങള് അയച്ചുവെന്നും ഇത് ശരിയല്ലെന്ന് പറഞ്ഞിട്ടും വീണ്ടും തുടര്ന്നുവെന്നും പുതുമുഖ നടി റിനി ആന് ജോര്ജ് .നേതാവിന്റെ പേര് വെളിപ്പെടുത്തുന്നില്ല. ഈ വ്യക്തി ഉള്പ്പെട്ട പ്രസ്ഥാനത്തിലുള്ള പലരുമായും നല്ല ബന്ധമാണെന്നും നടി പറഞ്ഞു. സാമൂഹ്യ മാധ്യമത്തിലൂടെയാണ് ഇയാളുമായി പരിചയമുള്ളത്. ആദ്യ മുതല് മോശം സന്ദേശങ്ങള് അയച്ചു. എതിര്പ്പ് രേഖപ്പെടുത്തിയിട്ടും അയാള് അത് തുടര്ന്നു.
ആദ്യമായി സന്ദേശം അയച്ചത് മൂന്നര വര്ഷം മുന്പാണ്. അതിനുശേഷമാണ് അയാള് ജനപ്രതിനിധിയായത്. അയാള് കാരണം മറ്റു ബുദ്ധിമുട്ടുകള് ഇല്ലാത്തത് കൊണ്ടാണ് പരാതിയുമായി മുന്നോട്ട് പോകാത്തത്. പരാതിയുള്ളവര് അതുമായി മുന്നോട്ടു പോകട്ടെ.ഫൈവ് സ്റ്റാര് ഹോട്ടലിലേക്ക് ക്ഷണിച്ചെന്നും നടി വെളിപ്പെടുത്തി
പാര്ട്ടി നേതാക്കളോട് പരാതി പറഞ്ഞു. നടപടിയുണ്ടായില്ല. പ്രതിപക്ഷ നേതാവിനോട് കാര്യം പറഞ്ഞിരുന്നതായി നടി മാധ്യമങ്ങളോട് പറഞ്ഞു. പാര്ട്ടിയിലെ പല സ്ത്രീകള്ക്കും ദുരനുഭവമുണ്ടായി. അവര് കാര്യങ്ങള് തുറന്നു പറയണം. ധാര്മികതയുണ്ടെങ്കില് നേതൃത്വം നടപടിയെടുക്കണമെന്നും റിനി ആന് ജോര്ജ് പറഞ്ഞു.പുറത്തു പറയുമെന്ന് പറഞ്ഞപ്പോള് പോയി പറയൂ എന്നായിരുന്നു യുവ നേതാവിന്റെ നിലപാടെന്നും യുവ നടി പറഞ്ഞു.
ഇത്തരത്തില് ദുരനുഭവം ഇനിയും ആവര്ത്തിച്ചാല് പേര് വെളിപ്പെടുത്തുമെന്നും റിനി ആന് ജോര്ജ് പറഞ്ഞു. നല്ലൊരു സൗഹൃദമായിരുന്നു യുവ നേതാവില് നിന്ന് പ്രതീക്ഷിച്ചതെന്ന് റിനി പറയുന്നു.
ചാനല് ചര്ച്ചകളിലും സമരമുഖങ്ങളിലും സജീവമായി നില്ക്കുന്നയാളാണ് ഈ യുവനേതാവ്.ആദ്യം മോശമായി പെരുമാറരുതെന്ന് മുന്നറിയിപ്പ് നല്കിയിരുന്നു. ഇതിന് ശേഷം കുറച്ച് നാള് പ്രശ്നമുണ്ടായിരുന്നില്ല. എന്നാല് വീണ്ടും മോശമായി പെരുമാറാന് തുടങ്ങി. അതുകൊണ്ടാണ് ഇപ്പോള് വെളിപ്പെടുത്തേണ്ടി വന്നതെന്ന് റിനി ആന് ജോര്ജ് പറഞ്ഞു.
