കൊച്ചി: പീഡനക്കേസിൽ ഹിരൺദാസ് മുരളിയെന്ന റാപ്പർ വേടൻ ഒളിവിലാണെന്ന് കൊച്ചി പോലീസ് കമ്മീഷണർ പുട്ട വിമലാദിത്യ. വിദേശത്തേക്ക് പോകാന് സാധ്യതയുള്ളതിനാല് മുന്കരുതല് എടുത്തെന്നും കമ്മിഷണര് പറഞ്ഞു. വേടന്റെ മുൻകൂർ ജാമ്യാപേക്ഷ കോടതിയുടെ പരിഗണനയിലാണ്. കോടതിയുടെ നിർദേശപ്രകാരമായിരിക്കും അടുത്ത നടപടികൾ.
റാപ്പർക്കെതിരായ പുതിയ പരാതി പോലീസിന് ലഭിക്കുന്നതേയുള്ളൂ. വേടനെ സംരക്ഷിക്കുന്ന നിലപാട് പോലീസിന് ഇല്ലെന്നും അദ്ദേഹം കൊച്ചിയിൽ മാധ്യമങ്ങളോട് പറഞ്ഞു. ശരിയായ രീതിയിൽ അന്വേഷണം മുന്നോട്ട് പോകുന്നുണ്ട്. തെളിവുകൾ ശേഖരിക്കുന്നതും സാക്ഷികളെ കണ്ട് കാര്യങ്ങൾ അന്വേഷിക്കുന്നതുമടക്കമുള്ള കാര്യങ്ങൾ സജീവമായി നടക്കുന്നുണ്ടെന്നും അദ്ദേഹം വ്യക്തമാക്കി.
കേസിൽ റാപ്പര് വേടന്റെ അറസ്റ്റ് ഹൈക്കോടതി കഴിഞ്ഞ ദിവസം തടഞ്ഞിരുന്നു. മുന്കൂര് ജാമ്യാപേക്ഷ പരിഗണിക്കുന്നതുവരെയാണ് അറസ്റ്റിനുള്ള വിലക്ക്. വേടനെതിരെ കൂടുതല് പരാതികള് മുഖ്യമന്ത്രിക്ക് ലഭിച്ചുവെന്ന് മുന്കൂര് ജാമ്യാപേക്ഷയെ എതിര്ത്ത് പരാതിക്കാരി വാദിച്ചു. എന്നാൽ ക്രിമിനൽ നടപടിക്രമത്തിൽ മുഖ്യമന്ത്രിക്ക് എന്താണ് പങ്കെന്ന് കോടതി ചോദിച്ചു. വേടനെതിരെ കൂടുതല് കേസുകള് റജിസ്റ്റര് ചെയ്തിട്ടുണ്ടോയെന്ന് അറിയിക്കാൻ പൊലീസിന് കോടതി നിർദേശം നൽകി.
വാദത്തിനിടെ ഉഭയകക്ഷി സമ്മതപ്രകാരമുള്ള ശാരീരിക ബന്ധം എങ്ങനെ ബലാത്സംഗമാകുമെന്ന് പരാതിക്കാരിയോട് ജസ്റ്റിസ് ബെച്ചു കുര്യൻ തോമസ് ചോദിച്ചു. ബന്ധത്തില് വിള്ളലുണ്ടാകുമ്പോഴൊക്കെ ബലാത്സംഗമായി കണക്കാക്കാനാവില്ലെന്നും കോടതി നിരീക്ഷിച്ചു.
