മറ്റ് സംസ്ഥാനങ്ങളില്‍ നിന്നുള്ള വാഹനങ്ങള്‍ കര്‍ക്കശമായി പരിശോധിക്കാന്‍ പൊലീസും എക്‌സൈസും

ആലപ്പുഴ: മറ്റ് സംസ്ഥാനങ്ങളില്‍ നിന്ന് വരുന്ന ടൂറിസ്റ്റ് ബസ്സുകളിലും മറ്റു വാഹനങ്ങളിലും പൊലീസ്, എക്‌സൈസ് വകുപ്പുകള്‍ സംയുക്തമായി പരിശോധന നടത്താന്‍ തീരുമാനം. ഓണക്കാലത്തെ ലഹരി ഉപയോഗം നിയന്ത്രിക്കുകയാണ് ലക്ഷ്യം. ഇതര സംസ്ഥാന തൊഴിലാളികളുടെ വാസസ്ഥലങ്ങളിലും പരിശോധന നടത്തും. ലഹരി കൈമാറ്റം കൂടുതലായുള്ള സ്ഥലങ്ങളെക്കുറിച്ചുള്ള വിവരങ്ങള്‍ ലഭിച്ചിട്ടുണ്ട് . അവിടെ പ്രത്യേക നിരീക്ഷണം നടത്തും.
2024 ഡിസംബര്‍ 12ന് ശേഷം ആലപ്പുഴ എക്‌സൈസ് ഡിവിഷനില്‍ 870 അബ്കാരി കേസുകളും 4637 കോട്പ കേസുകളും എടുക്കുകയും 727 അബ്കാരി കേസുകളില്‍ പ്രതികളെ പിടികൂടുകയും ചെയ്തിട്ടുണ്ടെന്ന് അധികൃതര്‍ അറിയിച്ചു. 326.932 ലിറ്റര്‍ ചാരായം, 2051.050 ലിറ്റര്‍ വിദേശമദ്യം, 5500 ലിറ്റര്‍ വാഷ്, 95.5 ലിറ്റര്‍ അന്യസംസ്ഥാന മദ്യം എന്നിവ കണ്ടെടുത്തു. 26 വാഹനങ്ങള്‍ പിടിച്ചെടുക്കുകയും 9,27,400 രൂപ കോട്പ ഇനത്തില്‍ പിഴ ചുമത്തുകയും ചെയ്തിട്ടുണ്ട്. 811 എന്‍ഡിപിഎസ് കേസുകളില്‍ 811 പ്രതികളെ അറസ്റ്റ് ചെയ്തു.