ആലപ്പുഴ: വിവിധ ജില്ലകളില് നിന്നുളളവര്ക്ക് നെഹ്റു ട്രോഫി വള്ളംകളി കാണാന് കെ.എസ്.ആര്.ടി.സി ബജറ്റ് ടൂറിസം സെല് അവസരമൊരുക്കുന്നു.’കെ.എസ്.ആര്.ടി.സി.യില് യാത്ര ചെയ്ത് ആലപ്പുഴ പുന്നമടക്കായലില് നടക്കുന്ന കായല് ജലോത്സവത്തില് പങ്കെടുക്കാം.
വള്ളംകളിയുടെ ടിക്കറ്റ് ഉള്പ്പെടെയാണ് കെ.എസ്.ആര്.ടി.സി.യില് യാത്ര ക്രമീകരിച്ചിട്ടുളളത്. വിവിധ ജില്ലകളില് നിന്നും ആവശ്യത്തിനനുസരിച്ച് ചാര്ട്ടേഡ് ബസ് ഒരുക്കി നെഹ്റു ട്രോഫിയുടെ റോസ് കോര്ണര്, വിക്ടറി ലൈന് എന്നീ വിഭാഗങ്ങളിലാണ് പ്രവേശനം.
മറ്റ് ജില്ലകളില് നിന്നും ആലപ്പുഴയില് നേരിട്ട് എത്തുന്നവര്ക്ക് നെഹ്റു ട്രോഫി വള്ളംകളിയുടെ പാസ് എടുക്കാന് പ്രത്യേക കൗണ്ടര് ആലപ്പുഴ ഡിപ്പോയില് പ്രവര്ത്തിക്കും.എല്ലാ ഇനം പാസുകളും ഈ ടിക്കറ്റ് കൗണ്ടറില് നിന്നും ലഭിക്കും.
2022-ല് 1,75,100-രൂപയുടെ ടിക്കറ്റുകളും, 2023-ല് 2,99,500-യുടെ ടിക്കറ്റുകളും കെ.എസ്.ആര്.ടി.സി ബജറ്റ് ടൂറിസം സെല്ലിലൂടെ വിറ്റിട്ടുണ്ട്. മുണ്ടക്കൈ ദുരന്തത്തിന് ശേഷം മാറ്റിവച്ച 2024-ലെ വള്ളംകളി ടിക്കറ്റ് വില്പ്പനയിലൂടെ 1,16,500 രൂപയാണ് നേടിയത്.
9846475874 എന്ന നമ്പറിലേക്ക് പേര്, പാസ് ഇനം, എത്ര പേര്ക്ക് എന്ന വിവരം വാട്സ്ആപ്പ് സന്ദേശമായി അയച്ച് ആലപ്പുഴ ഡിപ്പോയിലെ ബജറ്റ് ടൂറിസം സെല്ലിന്റെ ക്യു ആര് കോഡിലേക്ക് ഓണ്ലൈനായി പണമടച്ചാലും ടിക്കറ്റ് ലഭിക്കും. ഈ ടിക്കറ്റുകള് വള്ളംകളി നടക്കുന്ന 2025 ആഗസ്റ്റ് 30-ന് അല്ലെങ്കില് തലേ ദിവസം ആലപ്പുഴ കെ.എസ്.ആര്.ടി.സി ഡിപ്പോയിലെ സ്പെഷ്യല് കൗണ്ടറില് നിന്ന് കൈപ്പറ്റി വള്ളംകളി കാണാനാകും.ആലപ്പുഴ ജില്ലയ്ക്ക് പുറമെ കോട്ടയം, എറണാകുളം, പത്തനംതിട്ട, കൊല്ലം, തിരുവനന്തപുരം ജില്ലകളിലെ സ്പെഷ്യല് കൗണ്ടറുകളിലൂടെയും ജില്ലാ കോ-ഓര്ഡിനേറ്റര്മാര് മുഖേനയും കെ.എസ്.ആര്.ടി.സി ബജറ്റ് ടൂറിസം സെല് ടിക്കറ്റുകള് വില്ക്കും.
