ലഖ്നൗ: ഉത്തര്പ്രദേശില് രണ്ട് വര്ഷത്തിനിടെ ഗുരുതരമായ കുറ്റകൃത്യങ്ങളില് പിടിക്കപ്പെട്ട എണ്ണായിരത്തിലധികം പ്രതികള്ക്ക് ജീവപര്യന്തം തടവും 70 പേര്ക്ക് വധശിക്ഷയും വിധിച്ചിട്ടുണ്ടെന്ന് പോലീസ് ഡയറക്ടര് ജനറല് രാജീവ് കൃഷ്ണ. കുറ്റകൃത്യങ്ങളോടും അഴിമതിയോടും യുപി പോലീസിന്റെ വിട്ടുവീഴ്ചയില്ലാത്ത നയമാണിതെന്നും അദ്ദേഹം പറഞ്ഞു. സ്വാതന്ത്ര്യദിനത്തോടനുബന്ധിച്ച് നടന്ന പരിപാടിയിലാണ് യുപി ഡിജിപിയുടെ വെളിപ്പെടുത്തല്.
സംസ്ഥാനത്തെ സ്ത്രീകള്ക്ക് കൂടുതല് സുരക്ഷിതത്വം ഉറപ്പാക്കുന്ന തരത്തിലുള്ള സംവിധാനമാണ് യുപിയില് നടപ്പാക്കുന്നതെന്നും ഡിജിപി പറഞ്ഞു. 2023 ജൂലൈ ഒന്ന് മുതല് ഒരു ലക്ഷത്തിലധികം ആളുകള് ശിക്ഷിക്കപ്പെട്ടിട്ടുണ്ട്. ഇതില് 70 പേര്ക്ക് വധശിക്ഷയും 8785 പേര്ക്ക് ജീവപര്യന്തം തടവും വിധിച്ചു.
2017 മുതല് 34 മാഫിയ നേതാക്കളെയും അവരുടെ 91 കൂട്ടാളികളെയും കുറ്റക്കാരായി കണ്ടെത്തി. ഇതില് രണ്ട് പേര്ക്ക് വധശിക്ഷ വിധിച്ചു. ഗുണ്ടാ നിയമപ്രകാരം 14,400 കോടിയിലധികം വിലമതിക്കുന്ന സ്വത്തുക്കള് കണ്ടുകെട്ടിയിട്ടുണ്ടെന്നും കൃഷ്ണ പറഞ്ഞു. ക്രിമിനല് ശൃംഖലകളെ തകര്ത്തതിന് ഉത്തര്പ്രദേശ് സ്പെഷല് ടാസ്ക് ഫോഴ്സ്, തീവ്രവാദ വിരുദ്ധ സ്ക്വാഡ്, ലഹരിവിരുദ്ധ ടാസ്ക് ഫോഴ്സ്, ജില്ലാ പോലീസ് എന്നിവരെ അദ്ദേഹം പ്രശംസിച്ചു. സ്ത്രീ ശാക്തീകരണം, ഓരോ പൗരന്റെയും പരാതി വേഗത്തിലും സംവേദന ക്ഷമതയോടെയും പരിഹരിക്കുക തുടങ്ങിയവയാണ് യുപി പോലീസിന്റെ പ്രധാന മുന്ഗണനകളെന്നും അദ്ദേഹം പറഞ്ഞു.
