ന്യൂദല്ഹി: പാകിസ്ഥാന് വേണ്ടി ചാരവൃത്തി നടത്തിയ കേസില് അറസ്റ്റിലായ യൂട്യൂബര് ജ്യോതി മല്ഹോത്രയ്ക്കെതിരെ പ്രത്യേക അന്വേഷണ സംഘം 2500 പേജുകളുള്ള കുറ്റപത്രം സമര്പ്പിച്ചു.
ശക്തമായ തെളിവുകളാണ് ഹിസാര് പോലീസിന്റെ പ്രത്യേക അന്വേഷണ സംഘം സമര്പ്പിച്ച കുറ്റപത്രത്തിലുള്ളത്. ഇവര് ഐഎസ്ഐ ഏജന്റുമാരുമായി സ്ഥിരമായി ബന്ധപ്പെട്ടിരുന്നത് സംബന്ധിച്ച രേഖകള് കണ്ടെത്തി. നാളുകളായി ഇവര് ചാരവൃത്തി തുടരുകയായിരുന്നുവെന്നും പാകിസ്ഥാന് സന്ദര്ശനത്തിനിടെ ഇന്റലിജന്സ് കൈകാര്യം ചെയ്യുന്നവരുമായി അവര് ബന്ധപ്പെട്ടുവെന്നും കുറ്റപത്രത്തില് പറയുന്നു.
ഭാരതത്തിലെ പാകിസ്ഥാന് ഹൈക്കമ്മീഷന് ഉദ്യോഗസ്ഥനായിരുന്ന എഹ്സാന് റഹീം എന്ന ഡാനിഷ് അലിയുമായി ജ്യോതി നടത്തിയ ഫോണ് സംഭാഷണങ്ങള് ഫോറന്സിക് പരിശോധനയിലൂടെ കണ്ടെടുത്തു. ഷാക്കിര്, ഹസന് അലി, നാസിര് ദില്ലണ് എന്നീ ഐഎസ്ഐ ചാരന്മാരുമായുള്ള അവരുടെ ബന്ധവും കുറ്റപത്രത്തില് പരാമര്ശിച്ചിട്ടുണ്ട്. ഹരിയാന സ്വദേശിയായ ജ്യോതി മല്ഹോത്ര മെയ് 16നാണ് അറസ്റ്റിലാകുന്നത്.
