ന്യൂദല്ഹി: ചൈനയും ഇന്ത്യയും തമ്മില് കൂടുതല് അടുക്കുന്നതിന്റെ ഭാഗമായി ചൈന ഇതുവരെ നല്കാതിരുന്ന യൂറിയ വളം ഇന്ത്യയിലേക്ക് അയച്ചു തുടങ്ങി. ചൈനയില് നിന്നും രാസവളം കിട്ടാതെ ഇന്ത്യയിലെ കൃഷിക്കാര് ഏറെ പ്രതിസന്ധിയിലായിരുന്നു. ഇതോടെ സൗദി ഉള്പ്പെടെയുള്ള രാജ്യങ്ങളില് നിന്നും വളം ഇറക്കുമതി ചെയ്ത് താല്ക്കാലികപരിഹാരം കാണുകയായിരുന്നു ഇന്ത്യ. ചൈനയില് നിന്നും യൂറിയ കിട്ടിത്തുടങ്ങിയതോടെ കേന്ദ്ര സര്ക്കാരിനും ഇന്ത്യയിലെ കൃഷിക്കാര്ക്കും ആശ്വാസമായി.
ഇന്ത്യയും ചൈനയും തമ്മില് വര്ധിച്ചുവരുന്ന ഈ അടുപ്പം സസൂക്ഷ്മം നിരീക്ഷിക്കുകയാണ് അമേരിക്ക. മോദിയും ഷീ ജിന്പിങ്ങും തമ്മിലുള്ള സൗഹൃദം ട്രംപിന്റെ ഉറക്കം കെടുത്തുകയാണ്. മാത്രമല്ല, ട്രംപിനെയും യൂറോപ്യന് യൂണിയനെയും ധിക്കരിച്ചുകൊണ്ട് റഷ്യയുടെ എണ്ണ മുഴുവനായി വാങ്ങുമെന്ന് പ്രഖ്യാപിച്ചിരിക്കുകയാണ് ചൈന.
ഇപ്പോള് ഇന്ത്യയിലേക്ക് യൂറിയ അയക്കുന്നതില് ഏര്പ്പെടുത്തിയ നിരോധനം ഭാഗികമായി നീക്കിയിരിക്കുകയാണ് ചൈന. കഴിഞ്ഞ ദിവസം മുതല് ഇന്ത്യയിലേക്ക് ചൈന യൂറിയ അയച്ചു തുടങ്ങി. ഇതിന് തൊട്ടുമുന്പ് യൂറോപ്യന് യൂണിയന്റെ ഉപരോധം അനുഭവിക്കുന്ന നയാര എന്ന ഇന്ത്യയില് പ്രവര്ത്തിക്കുന്ന റഷ്യന് കമ്പനി ചൈനയിലേക്ക് ഡീസല് അയച്ചിരുന്നു. ഏകദേശം 4,96,000 ബാരല് ഡീസലാണ് അയച്ചത്. മലേഷ്യയിലേക്ക് പോയ ചരക്ക് കപ്പല് ഇപ്പോള് ചൈനയിലെ ഷൂഷാന് തുറമുഖത്തിലേക്ക് നീങ്ങിക്കൊണ്ടിരിക്കുകയാണെന്നും ആഗസ്ത് 20ന് ചൈനയില് എത്തുമെന്നുമാണ് ബ്ലൂംബെര്ഗ് പത്രം റിപ്പോര്ട്ട് ചെയ്യുന്നത്.
ചൈന ഇന്ത്യയ്ക്കെതിരെ ഏര്പ്പെടുത്തിയിരുന്ന യൂറിയ നിയന്ത്രണം നീക്കി. കഴിഞ്ഞ ദിവസം മുതല് ചൈന ഇന്ത്യയിലേക്ക് യൂറിയ അയച്ചുതുടങ്ങി. യൂറിയയുടെ വലിയ ഇറക്കുമതി രാജ്യമാണ് ഇന്ത്യ. കാരണം ഇന്ത്യയുടെ കൃഷിഭൂമി വിപുലമാണ്. ഏകദേശം 77.4 കോടി ഡോളറിന്റെ യൂറിയ ഇന്ത്യ ചൈനയില് നിന്നും ഇറക്കുമതി ചെയ്യുന്നുണ്ട്.
ആഗസ്ത് 31ന് ചൈനയിലെ ടിയാന്ജിനില് ആരംഭിക്കുന്ന എസ് സിഒ യോഗത്തില് പ്രധാനമന്ത്രി മോദി പങ്കെടുക്കും. പാകിസ്ഥാന്, ചൈന, ഇന്ത്യ, റഷ്യ എന്നീ രാജ്യങ്ങളുടെ പ്രതിനിധികളാണ് പങ്കെടുക്കുക. അഞ്ച് വര്ഷത്തെ ഇടവേളയ്ക്ക് ശേഷം ഇന്ത്യയും ചൈനയും അതിര്ത്തി ചര്ച്ചകള് പുനരാരംഭിക്കുകയാണ്. ലിപുലേഖ്, ഷിപ് കി ലാ, നാഥു ലാ എന്നീ മലയിടുക്കുകളിലൂടെ വീണ്ടും ഇന്ത്യ-ചൈന വ്യാപാരം പുനരാരംഭിക്കുന്നതിനെക്കുറിച്ചും ആലോചിച്ചുവരുന്നതായി ഇന്ത്യയുടെ വിദേശകാര്യവക്താവ് രണ്ധീര് ജയ്സ്വാള് പറയുന്നു.
യുഎസിന്റെയും യൂറോപ്യന് യൂണിയന്റെയും ഇരട്ടത്താപ്പിനെതിരെ ഇന്ത്യയും ചൈനയും
എന്തായാലും റഷ്യയില് നിന്നും എണ്ണവാങ്ങുന്നതിനെതിരെ യുഎസ് ഇന്ത്യയ്ക്കെതിരെ 50 ശതമാനം വ്യാപാരച്ചുങ്കം ഏര്പ്പെടുത്തിയതും യൂറോപ്യന് യൂണിയന് ഇന്ത്യയ്ക്കെതിരെ ശക്തമായ ഉപരോധം ഏര്പ്പെടുത്തുകയും ചെയ്തതോടെയാണ് ഇന്ത്യ കൂടുതലായി ചൈനയിലേക്ക് തിരിയുന്നത്. ആഗസ്ത് 27 മുതല് ഇന്ത്യയ്ക്കെതിരായ 50 ശതമാനം വ്യാപാരത്തീരുവ നിലവില് വരും.
ചൈനയും റഷ്യയില് നിന്നും എണ്ണ വാങ്ങുന്നതിന്റെ പേരില് യുഎസിന്റെ നോട്ടപ്പുള്ളിയാണെങ്കിലും ചൈനയില് നിന്നും അപൂര്വ്വ ധാതുക്കളും മറ്റും കിട്ടണമെന്നുള്ളതിനാല് യുഎസ് ഇനിയും ചൈനയ്ക്കെതിരെ ഉയര്ന്ന വ്യാപാരച്ചുങ്കം ഏര്പ്പെടുത്തിയിട്ടില്ല. പക്ഷെ റഷ്യന് എണ്ണ വന്തോതില് വാങ്ങാന് തന്നെയാണ് ചൈനയുടെ തീരുമാനം. റഷ്യയില് നിന്നും പല സാധനങ്ങളും യുഎസും യൂറോപ്യന് യൂണിയനും ഇറക്കുമതി ചെയ്യുമ്പോള് ഇന്ത്യ റഷ്യയില് നിന്നും എണ്ണ വാങ്ങുന്നതിന് മാത്രം ഉയര്ന്ന ചുങ്കവും ഉപരോധവും ഏര്പ്പെടുത്തുന്നത് ഇരട്ടത്താപ്പാണെന്ന് ഇന്ത്യ കുറ്റപ്പെടുത്തുന്നു. ഇന്ത്യയ്ക്കെതിരെ ഭീകരാക്രമണം നടത്തിയ പാകിസ്ഥാനെ അപലപിക്കാന് തയ്യാറല്ലാത്ത യുഎസും യൂറോപ്യന് രാജ്യങ്ങളും അവര്ക്ക് ഭീഷണിയുള്ളപ്പോള് മാത്രം ഭീകരവാദത്തെ അപലപിക്കുന്നതും ഇരട്ടത്താപ്പാണെന്ന് ഇന്ത്യ കരുതുന്നു.
