ന്യൂദല്ഹി: ഭാരത ബഹിരാകാശ പദ്ധതിയുടെ പിതാവായ ഡോ. വിക്രം സാരാഭായിയുടെ ജന്മദിനത്തോടനുബന്ധിച്ച്, ഭാരതത്തിലെ ആദ്യ തദ്ദേശീയ ഭൗമനിരീക്ഷണ ഉപഗ്രഹങ്ങള് നിര്മിക്കുന്നതിനും പ്രവര്ത്തിപ്പിക്കുന്നതിനുമായി ഇന്ത്യന് നാഷണല് സ്പേസ് പ്രമോഷന് ആന്ഡ് ഓതറൈസേഷന് സെന്റര് ഒരുങ്ങുന്നു.
സര്ക്കാര് മാതൃകയില് നിന്ന് പൊതു-സ്വകാര്യ പങ്കാളിത്തത്തിലേക്കുള്ള നിര്ണായകമായ മാറ്റമാണിത്. അടുത്ത അഞ്ചു വര്ഷത്തിനുള്ളില് 12 നൂതന ഉപഗ്രഹങ്ങള് വിന്യസിക്കുന്നതിനായി 1200 കോടിയിലധികം നിക്ഷേപിക്കും. ഇത് പ്രാബല്യത്തില് വരുന്നതോടെ ഭാരതത്തിനും തദ്ദേശീയമായ ഉപഗ്രഹങ്ങളിലൂടെ ഉയര്ന്ന റെസല്യൂഷന് ചിത്രങ്ങള് ലഭിക്കും. ഭാരതത്തിലെ സ്വകാര്യ ബഹിരാകാശ വ്യവസായത്തിന്റെ വരവിനെയാണ് ഇത് സൂചിപ്പിക്കുന്നതെന്ന് INspace ചെയര്മാന് ഡോ. പവന് ഗോയങ്ക പറഞ്ഞു.
വരാനിരിക്കുന്ന 12 ഉപഗ്രഹങ്ങളില് അത്യാധുനിക സെന്സറുകള് ഉള്പ്പെടുത്തും. കാലാവസ്ഥാ വ്യതിയാന നിരീക്ഷണം, ദുരന്തനിവാരണം, കൃഷി, സമുദ്ര നിരീക്ഷണം എന്നിവയ്ക്ക് സേവനങ്ങള് ലഭിക്കും.
