പയ്യന്നൂര് : കുവൈറ്റില് വീട്ടുജോലിക്ക് പോയി ശാരീരികവും മാനസികവുമായി കൊടിയ പീഡനങ്ങളേറ്റു വാങ്ങിയ ഭുവനേശ്വരിയെ നാട്ടിലെത്തിച്ചു . കഷ്ടപ്പാടുകള് നിറഞ്ഞ ജീവിതത്തില് നിന്ന് കരകയറാമെന്ന പ്രതീക്ഷയില് ഏജന്റ് മുഖാന്തരം ഭുവനേശ്വരി എതാനും മാസം മുന്നേയാണ് കുവൈറ്റില് പോയത് .രക്ഷപ്പെട്ട് നാട്ടിലേക്ക് മടങ്ങാന് പലവഴിക്കും ശ്രമിച്ചെങ്കിലും ഫലവത്തായിരുന്നില്ല.
തമിഴ്നാട് കടലൂര് സ്വദേശിനി ഭുവനേശ്വരി പ്രായമായ അമ്മയോടൊപ്പം 30 വര്ഷം മുന്നേ പയ്യന്നൂര് എത്തിയതാണ്. ആക്രിക്കച്ചവടം ചെയ്താണ് ജീവിതം മുന്നോട്ട് പോയിരുന്നത്. നാലു മക്കളുള്ള ഭുവനേശ്വരിയുടെ രോഗശയ്യയിലായ ഭര്ത്താവ് തമിഴ്നാട്ടിലാണ്.
ഇതിനിടെയാണ്പയ്യന്നൂരില് രണ്ട് പെണ്കുട്ടികളടക്കം ഭുവനേശ്വരിയുടെ നാലു മക്കളും അമ്മ ജ്യോതിയും താമസിച്ചിരുന്ന വാടകമുറി കനത്ത മഴയില് തകര്ന്നത്. ഇതു സംബന്ധിച്ച വാര്ത്ത മാധ്യമത്തില് വന്നത് ശ്രദ്ധയില് പെട്ട ശ്രീരാഘവപുരം സഭായോഗത്തിന്റെ സാമൂഹ്യക്ഷേമവിഭാഗം അര്ദ്ധപട്ടിണിയിലായ കുടുംബത്തെ ഏറ്റെടുത്ത് കരിവെള്ളൂരില് താല്ക്കാലികഭവനം അവര്ക്കായി സജ്ജമാക്കി.
ഭുവനേശ്വരി കുവൈറ്റില് കുടുങ്ങിയ വിവരമറിഞ്ഞ സഭായോഗം ഭാരവാഹികള് ,വിവിധ രാജ്യങ്ങളില് ചതിവില് പെട്ട് കഴിയുന്ന പാവങ്ങളെ നേരിട്ടും എംബസി വഴിയും രക്ഷിക്കുന്ന സന്നദ്ധസംഘടനയായ രക്ഷണം ചാരിറ്റബിള് ട്രസ്റ്റുമായി ബന്ധപ്പെട്ടു. രക്ഷണം ട്രസ്റ്റിന്റെ പ്രവര്ത്തകരായ രാഘവന് ആയമ്പാറ, ,അനൂപ് സുദേവന് കൊല്ലങ്കോട്, ഹരീഷ്ബാബു കുന്നംകുളം തുടങ്ങിയവരുടെ കൂട്ടായ പ്രയത്നത്തില് കേവലം ഒരാഴ്ചക്കുള്ളില് ഭുവനേശ്വരിയെ നാട്ടിലെത്തിക്കാന് സാധിച്ചു.
കൊച്ചിയില് വിമാനമിറങ്ങിയ ഭുവനേശ്വരിയെ രാഘവപുരം സഭായോഗത്തിന്റെ എറണാകുളം ജില്ലാ ഭാരവാഹികളായ ചെങ്ങോത്ത് ശ്രീനിവാസന് നമ്പൂതിരി, ഉഷ അന്തര്ജനം, ചന്ദ്രശേഖരന് എടക്കാട്ടില് ഇല്ലം എന്നിവരുടെ നേതൃത്വത്തില് സ്വീകരിച്ചു. കണ്ണൂരില് ഭുവനേശ്വരിയുടെ കുടുംബത്തോടൊപ്പം ശ്രീകാന്ത് ഭട്ടതിരി, ശ്യാമള എടമന, സുബ്രഹ്മണ്യന് നമ്പൂതിരി വി.ഐ, ശങ്കരന് കൈതപ്രം എന്നിവര് ഭുവനേശ്വരിയെ വരവേറ്റു. ശ്രീരാഘവപുരം സഭായോഗം കരിവെള്ളൂരില് തയാറാക്കിയ സ്നേഹഭവനത്തില് ഇന്ന് ഇവരുടെ ഗൃഹപ്രവേശച്ചടങ്ങ് നടക്കും.
