തമിഴ്നാട്ടിൽ മാത്രമല്ല കേരളത്തിലും ഏറെ ആരാധകരുള്ള താരമാണ് രജനികാന്ത് . പലപ്പോഴും രജനികാന്ത് ഷൂട്ടിംഗിനായി കേരളത്തിൽ എത്തുമ്പോൾ ഈ സ്നേഹം മലയാളി പ്രേക്ഷകർ കാണിക്കാറുമുണ്ട്. ഇപ്പോഴിതാ രജനികാന്തിന്റെ ഹൈദരാബാദിൽ നിന്നുള്ള ദൃശ്യങ്ങളാണ് സോഷ്യൽ മീഡിയയിൽ വൈറലാകുന്നത് .
ഹൈദരാബാദിലേക്കുള്ള വിമാനത്തിൽ ആരാധകരുടെ അഭ്യർത്ഥന മാനിച്ച് രജനീകാന്ത് അവരെ അഭിവാദ്യം ചെയ്യുന്നതും അവർ ആവേശത്തോടെ തലൈവരെ വിളിക്കുന്നതും ദൃശ്യങ്ങളിൽ കാണാം.
വീഡിയോയിൽ, രജനീകാന്തും മകൾ ഐശ്വര്യയും ഇക്കണോമി ക്ലാസിൽ മുൻ നിര സീറ്റുകളിൽ ഇരിക്കുന്നത് കാണാം. ഇതിനിടെ ആരാധകരിൽ ഒരാൾ “തലൈവാ, മുഖം പാക്കണം“ എന്ന് ഉറക്കെ വിളിച്ചു പറയുന്നുണ്ട് . ഇത് കേട്ടതോടെ അദ്ദേഹം ഉടൻ തന്നെ എഴുന്നേറ്റു . സീറ്റുകൾക്ക് അഭിമുഖമായി നിന്ന് കൈവീശുകയും, എല്ലാവരെയും കൂപ്പുകൈകളോടെ അഭിവാദ്യം ചെയ്യുകയുമായിരുന്നു.
അതേസമയം സൺ പിക്ചേഴ്സ് ഒരുക്കുന്ന രജനീകാന്ത് ചിത്രം ‘കൂലി’ ഗ്രാൻഡ് റിലീസിനായി ഒരുങ്ങുകയാണ്. നാഗാർജുന, സൗബിൻ ഷാഹിർ, ഉപേന്ദ്ര, ആമിർ ഖാൻ, ശ്രുതി ഹാസൻ എന്നിവരടങ്ങുന്ന ഒരു കൂട്ടം താരനിരയാണ് ചിത്രത്തിൽ അണിനിരക്കുന്നത്. സ്വാതന്ത്ര്യദിനത്തിന് മുന്നോടിയായി ഓഗസ്റ്റ് 14 ന് കൂലി തിയേറ്ററുകളിൽ എത്തും.
