ന്യൂദൽഹി: തലസ്ഥാനത്തെ ബാബ ഖടക് സിംഗ് മാർഗിൽ പാർലമെന്റ് അംഗങ്ങൾക്കായി പുതുതായി നിർമ്മിച്ച 184 ടൈപ്പ്7 ബഹുനില ഫ്ലാറ്റുകൾ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. കൃഷ്ണ, ഗോദാവരി, കോസി, ഹൂഗ്ലി എന്നീ ഭാരതത്തിലെ നാല് വലിയ നദികളുടെ പേരുകളിലുള്ളതാണ് സമുച്ചയം. പുതിയ സമുച്ചയം ദൽഹിയിലെ എംപിമാരുടെ ജീവിത സൗകര്യം വർദ്ധിപ്പിക്കുമെന്ന് മോദി പറഞ്ഞു. ഫ്ലാറ്റുകളുടെ നിർമ്മാണത്തിൽ ഏർപ്പെട്ടിരിക്കുന്ന എഞ്ചിനീയർമാരെയും തൊഴിലാളികളെയും പ്രധാനമന്ത്രി അഭിനന്ദിച്ചു.
എംപി വസതികളുടെ കുറവ് ഉണ്ടായിരുന്നിട്ടും, 2004 നും 2014 നും ഇടയിൽ ലോക്സഭാ എംപിമാർക്കായി ഒരു പുതിയ ഭവന യൂണിറ്റ് പോലും നിർമ്മിച്ചിട്ടില്ലെന്ന് മോദി ചൂണ്ടിക്കാട്ടി. 2014 ന് ശേഷം, ഈ ഉദ്യമം ഒരു ദൗത്യമായി ഏറ്റെടുത്തു. 2014 മുതൽ ഏകദേശം 350 എംപി വസതികൾ നിർമ്മിച്ചിട്ടുണ്ടെന്നും അദ്ദേഹം പറഞ്ഞു.
രാജ്യം എംപിമാർക്ക് പുതിയ ഭവനങ്ങൾ പൂർത്തിയാക്കുമ്പോൾ, പ്രധാനമന്ത്രി ആവാസ് യോജനയിലൂടെ 4 കോടി ദരിദ്ര കുടുംബങ്ങൾക്ക് വീടുകളുടെ ഉടമസ്ഥാവകാശം സാധ്യമാക്കുമെന്നും അദ്ദേഹം കൂട്ടിച്ചേർത്തു. രാഷ്ട്രം ഒരു പുതിയ പാർലമെന്റ് മന്ദിരം നിർമ്മിക്കുമ്പോൾ തന്നെ നൂറുകണക്കിന് പുതിയ മെഡിക്കൽ കോളേജുകൾ സ്ഥാപിക്കുന്നുണ്ടെന്ന് മോദി പറഞ്ഞു. ഈ സംരംഭങ്ങളുടെ പ്രയോജനങ്ങൾ സമൂഹത്തിലെ എല്ലാ വിഭാഗങ്ങളിലേക്കും എത്തുന്നുണ്ടെന്ന് അദ്ദേഹം സ്ഥിരീകരിച്ചു.
ലോക്സഭാ സ്പീക്കർ ഓം ബിർള, കേന്ദ്ര മന്ത്രിമാർ, പാർലമെന്റ് അംഗങ്ങൾ എന്നിവർ ചടങ്ങിൽ പങ്കെടുത്തു.
