ചമ്പ: ഹിമാചൽ പ്രദേശിലെ ചമ്പയിൽ കാർ ആഴമുള്ള കൊക്കയിലേക്ക് മറിഞ്ഞുണ്ടായ അപകടത്തിൽ ആറ് പേർ മരിച്ചു. മരിച്ചവരിൽ രണ്ട് സ്ത്രീകളും രണ്ട് പുരുഷന്മാരും രണ്ട് കുട്ടികളും ഉൾപ്പെടുന്നു. 500 മീറ്റർ താഴ്ചയിലേക്കാണ് കാർ മറിഞ്ഞത്.
വ്യാഴാഴ്ച രാത്രി 9:20 ഓടെ ഭജ്റാഡുവിൽ നിന്ന് ശ്രീഗർ ഗ്രാമത്തിലേക്ക് പോകുകയായിരുന്ന സ്വിഫ്റ്റ് കാറാണ് അപകടത്തിൽപ്പെട്ടത്. സൗയ പത്രിയിൽ മലയിൽ നിന്ന് ഒരു വലിയ പാറക്കല്ല് ഓടിക്കൊണ്ടിരുന്ന കാറിന് മുകളിൽ വീഴുകയായിരുന്നു. ഇതേത്തുടർന്ന് കാർ നിയന്ത്രണം വിട്ട് 500 മീറ്റർ താഴെയുള്ള ഒരു മലയിടുക്കിലേക്ക് വീണു. കാറിലുണ്ടായിരുന്ന ആറ് പേരും സംഭവസ്ഥലത്ത് തന്നെ മരിച്ചു.
സലൂണി ഡിഎസ്പി രഞ്ജൻ ശർമ്മ അപകടം സ്ഥിരീകരിച്ചു. പോലീസ്, ഫയർഫോഴ്സ്, നാട്ടുകാർ എന്നിവരുടെ സഹായത്തോടെ രാത്രിയിൽ മൃതദേഹങ്ങൾ പുറത്തെടുത്തതായി അദ്ദേഹം പറഞ്ഞു. കാറിലുണ്ടായിരുന്ന എല്ലാവരും മരിച്ചുവെന്ന് അദ്ദേഹം പറഞ്ഞു. ഇവരെല്ലാം ചമ്പ ജില്ലയിലെ ചുര സബ്ഡിവിഷനിലെ താമസക്കാരാണ്.
മൃതദേഹങ്ങളുടെ പോസ്റ്റ്മോർട്ടം ടീസയിലെ സിവിൽ ആശുപത്രിയിൽ നടത്തുമെന്ന് ഡിഎസ്പി പറഞ്ഞു. അപകടത്തിൽ മരിച്ചവരെല്ലാം ഒരേ കുടുംബത്തിലെ അംഗങ്ങളാണെന്ന് ഡിഎസ്പി രഞ്ജൻ ശർമ്മ പറഞ്ഞു.
