കണ്ണൂര്:ടി പി വധക്കേസ് പ്രതി കൊടും ക്രിമിനലായ കൊടി സുനിയെ കണ്ണൂര് സെന്ട്രല് ജയിലില് നിന്ന് മാറ്റും. തവനൂര് ജയിലിലേക്ക് മാറ്റാനാണ് അധികൃതരുടെ തീരുമാനം.
കൊടി സുനിയും സംഘവും കണ്ണൂര് സെന്ട്രല് ജയിലില്വച്ചും ലഹരിസംഘത്തെ നിയന്ത്രിക്കുന്നതായി ജയില് വകുപ്പിന്റെ റിപ്പോര്ട്ടുണ്ട്. ജയിലിനകത്തും പുറത്തും ലഹരി ഉല്പ്പന്നങ്ങള് ഉപയോഗിക്കുന്നതിന് പുറമെ കൊടി സുനിയും സംഘവും വില്പ്പനയും നടത്തുന്നുവെന്നാണ് ജയില് വകുപ്പിന്റെ കണ്ടെത്തല്.ടിപി ചന്ദ്രശേഖരന് വധക്കേസിലെ കുറ്റവാളിയായ കിര്മാണി മനോജും മറ്റൊരു വധക്കേസ് പ്രതി ബ്രിട്ടോയുമാണ് കൂട്ടാളികളെന്ന് റിപ്പോര്ട്ടില് പറയുന്നു
റിപ്പോര്ട്ടിന്റെ പശ്ചാത്തലത്തിലാണ് കൊടി സുനിയെ ജയില് മാറ്റാനുളള നീക്കം. തവനൂര് ജയിലില് നിന്ന് ന്യൂ മാഹി ഇരട്ടക്കൊലക്കേസ് വിചാരണ ആവശ്യത്തിനാണ് കൊടി സുനിയെ കഴിഞ്ഞ ജനുവരിയില് കണ്ണൂരിലേക്ക് മാറ്റിയത്. കണ്ണൂര് സെന്ട്രല് ജയിലില് നേരത്തെ ലഭിച്ചുപോന്നിരുന്ന സൗകര്യങ്ങള് വീണ്ടും ഉപയോഗിച്ചാണ് ലഹരിസംഘങ്ങളെ നിയന്ത്രിക്കുന്നത്. ഫോണ് ചെയ്യാനുള്ള സൗകര്യം ഉള്പ്പടെ ലഭിക്കുന്നുവെന്ന പരാതി ശരിവയ്ക്കുന്നതാണ് ജയില്വകുപ്പിന്റെ റിപ്പോര്ട്ട്.
കണ്ണൂരിലെ അനുകൂല സാഹചര്യം തവനൂരില് കൊടി സുനിക്ക് ലഭിക്കില്ലെന്നാണ് കരുതുന്നത്. പരസ്യമദ്യപാനം പുറത്തായതിന് ശേഷം ന്യൂ മാഹി ഇരട്ടക്കൊലക്കേസ് അന്തിമ വാദം നടക്കുന്ന തലശേരി കോടതിയില് കൊടി സുനിയെ കൊണ്ടുവന്നിട്ടില്ല. മുഹമ്മദ് ഷാഫി, കൊടി സുനി, ഷിനോജ് എന്നിവരെ ഓണ്ലൈനിലാണ് ഹാജരാക്കുന്നത്. അതിനാല് ജയില്മാറ്റം ഉണ്ടായാലും വിചാരണയ്ക്ക് തടസമുണ്ടാകില്ല. വയനാട്ടില് പരോളില് കഴിയവെ വ്യവസ്ഥകള് ലംഘിച്ച് കൊടി സുനി കര്ണാകയിലേക്ക് പോയത് ലഹരി സംഘങ്ങളുമായുള്ള ഇടപാടിനാണോ എന്ന കാര്യം രഹസ്യാന്വേഷണ വിഭാഗം അന്വേഷിക്കുന്നുണ്ട്.
