തിരുവനന്തപുരം: ഭരണ വിരുദ്ധ വികാരത്തില് തിരിച്ചടി നേരിടും എന്ന ഭയത്താല് ഇടതുപക്ഷം തദ്ദേശസ്വയംഭരണ തെരഞ്ഞെടുപ്പ് അട്ടിമറിക്കാന് ശ്രമിക്കുന്നതായി ബിജെപി സംസ്ഥാന ജനറല് സെക്രട്ടറി അനൂപ് ആന്റണി. കേരളത്തില് രണ്ടേമുക്കാല് ലക്ഷത്തിലധികം ഇരട്ട വോട്ടുകള് ഉണ്ടെന്നും ബിജെപി സംസ്ഥാന ജനറല് സെക്രട്ടറി വാര്ത്താ സമ്മേളനത്തില് കണക്കുകള് പുറത്തു വിട്ടുകൊണ്ട് ആരോപിച്ചു. ഇടതുപക്ഷ യൂണിയനിലെ ഉദ്യോഗസ്ഥരെ കൂട്ടുപിടിച്ചാണ് ഇത്തരത്തില് തെരഞ്ഞെടുപ്പ് അട്ടിമറിക്കാനുളള ശ്രമം.
തദ്ദേശ സ്വയംഭരണ തെരഞ്ഞെടുപ്പില് പ്രകടനം മോശമാകുമെന്ന ഇടതുപക്ഷത്തിന്റെ ഉറച്ച ബോധ്യമാണ് തെരഞ്ഞെടുപ്പ് അട്ടിമറിക്കുന്ന പ്രവര്ത്തനങ്ങളിലേക്ക് അവരെ നയിക്കുന്നത്. സംസ്ഥാന സര്ക്കാരിനെതിരെയും ഇടതുപക്ഷം ഭരിക്കുന്ന തദ്ദേശസ്വയംഭരണ സ്ഥാപനങ്ങള്ക്കെതിരെയും വളരെ വലിയ ഭരണവിരുദ്ധ വികാരം നിലനില്ക്കുന്നു. ആ ഭരണവിരുദ്ധ വികാരം കൊണ്ടാണ് വരാന് പോകുന്ന തദ്ദേശസ്വയംഭരണ തെരഞ്ഞെടുപ്പില് മോശം പ്രകടനം നേരിടേണ്ടി വരുമെന്ന് ഇടതുപക്ഷം തിരിച്ചറിഞ്ഞിരിക്കുന്നത്. ആ തിരിച്ചറിവിന്റെ പശ്ചാത്തലത്തിലാണ് തെരഞ്ഞെടുപ്പ് അട്ടിമറിക്കാനുള്ള എല്ലാ നീക്കങ്ങളും നടത്തുന്നത്. വാര്ഡ് വിഭജനം മുതല് അതിനുള്ള ശ്രമങ്ങള് ആരംഭിച്ചു. അതുകൊണ്ട് മാത്രം ഒന്നും ആകില്ല എന്ന ബോധ്യം വന്നതുകൊണ്ടാണ് വോട്ടര് പട്ടികയിലും കൃത്രിമം കാണിക്കുന്നത്. സിസ്റ്റമാറ്റിക് ആയിട്ടുള്ള കൃത്രിമങ്ങളാണ് വോട്ടര് പട്ടികയില് കാണുന്നത്.
ലക്ഷക്കണക്കിന് ആളുകള്ക്ക് തദ്ദേശസ്വയംഭരണ തെരഞ്ഞെടുപ്പിന്റെ വോട്ടര് പട്ടികയില് ഇരട്ട വോട്ടുണ്ട്. തെരഞ്ഞെടുപ്പിനെ അട്ടിമറിക്കുന്ന രീതിയിലാണ് ഈ സംഖ്യ. പഞ്ചായത്ത് തിരിച്ചുള്ള കണക്കുകള് ബിജെപി ശേഖരിച്ചിട്ടുണ്ട്, അത് പരിശോധിക്കുകയും ചെയ്തു. തിരുവനന്തപുരം കോര്പ്പറേഷന് വലിയ ഉദാഹരണമാണ്.
മൂന്നു തരത്തിലാണ് തിരഞ്ഞെടുപ്പിന് അട്ടിമറിക്കാന് ശ്രമിക്കുന്നത്:
1. ഒരേ തിരിച്ചറിയല് കാര്ഡില് ഒന്നിലധികം വോട്ടുകള്/വോട്ടര്മാര്
2. ഒരേ വ്യക്തിക്ക് തന്നെ ഒരേ ഐഡി കാര്ഡ് നമ്പറില് പലസ്ഥലങ്ങളില് വോട്ട്
3. ഒരു വിലാസം, ഒരേ വ്യക്തി, ഒരേ ഗാര്ഡിയന് എന്നാല് വ്യത്യസ്ത ഐഡി കാര്ഡ് നമ്പറുകള്
ഇതിനുള്ള മൂന്ന് വിഭാഗങ്ങള്ക്കും ഉദാഹരണം ബിജെപിയുടെ കൈവശമുണ്ട്. ഫൈനല് ഡിലിമിറ്റേഷന് ഭാഗമായി കണക്കുകളിലും കരട് വോട്ടര് പട്ടികയിലെയും കണക്കുകള് തമ്മില് വലിയ പൊരുത്തക്കേടുകള് ഉണ്ട്. അതിന്റെ കണക്കുകളും തെളിവും ബിജെപിയുടെ കൈവശമുണ്ട്.
276799 ആളുകള്ക്കാണ് കേരളത്തില് ഇരട്ട വോട്ട് ഉള്ളത്. തിരുവനന്തപുരം കോര്പ്പറേഷനില് മാത്രം 7216 പേര്ക്ക് ഇത്തരത്തില് ഇരട്ട വോട്ടുണ്ടെന്ന് ബിജെപി കണ്ടെത്തി. മുകളില് പറഞ്ഞ 3 വിഭാഗങ്ങളില് ആയി ലക്ഷക്കണക്കിന് ആളുകളെയാണ് ഇടതുപക്ഷ മുന്നണി വോട്ടര് പട്ടികയില് ഉള്പ്പെടുത്തിയിരിക്കുന്നത്.
തിരുവനന്തപുരം നഗരസഭയിലെ 76-ാം നമ്പര് വാര്ഡ് ബീമാപള്ളി അട്ടിമറി ശ്രമങ്ങളുടെ ഒരു ഉദാഹരണമാണ്. ഫൈനല് ഡിലിമിറ്റേഷന് സമയത്ത് ജനസംഖ്യ 9875 ആയിരുന്നു. വോട്ടര് പട്ടികയുടെ കരട് പുറത്ത് വന്നപ്പോള് അത് പതിനാറായിരത്തില് കൂടുതലാണ്. ഇത് അട്ടിമറിയില്ലാതെ വേറെ എന്താണ്? ഇത് മറ്റാരും തിരിച്ചറിയില്ലെന്നാണ് ഇടതുപക്ഷം കരുതുന്നത് എങ്കില് അത് തെറ്റാണ്. അതിനെക്കുറിച്ച് ഭാരതീയ ജനതാ പാര്ട്ടി കൃത്യമായി പഠിച്ചിട്ടുണ്ട്.
തിരഞ്ഞെടുപ്പ് കമ്മീഷന് ഗൗരവമായി വിഷയത്തില് ഇടപെടണം. അടിയന്തരമായി നടപടി സ്വീകരിച്ച് ലക്ഷക്കണക്കിന് വരുന്ന ഇരട്ട വോട്ടുകള് കണ്ടെത്തി ഒഴിവാക്കണം. ഈ വിഷയത്തില് കൃത്യമായ അന്വേഷണം ബിജെപി ആവശ്യപ്പെടുന്നു. അട്ടിമറിക്ക് കൂട്ടുനിന്ന ഉദ്യോഗസ്ഥര്ക്കെതിരെ ക്രിമിനല് നടപടി സ്വീകരിക്കണം.
തിരുവനന്തപുരം കോര്പ്പറേഷന് അടക്കം മറ്റു പലയിടങ്ങളിലും ബിജെപി പരാതി നല്കിയിട്ടുണ്ട്. പരാതികള് തിരഞ്ഞെടുപ്പ് കമ്മീഷന് ഗൗരവമായി പരിഗണിച്ച് അന്വേഷണം നടത്തണമെന്നും അനൂപ് ആന്റണി ആവശ്യപ്പെട്ടു.
തിരുവനന്തപുരം നഗരസഭയിലെ പല വാര്ഡുകളിലും അന്തിമ ഡിലിമിറ്റേഷന് സമയത്തുണ്ടായതിനേക്കാള് വളരെയധികം കൂടുതലാണ് വോട്ടര് പട്ടികയിലെ കണക്ക്. ഇത് യാദൃശ്ചികമായി സംഭവിച്ചതല്ല, ഗുരുതര വീഴ്ചയാണെന്ന് ബിജെപി സംസ്ഥാന സെക്രട്ടറി വി വി രാജേഷ് പറഞ്ഞു. തിരുവനന്തപുരം സിറ്റി ജില്ലാ പ്രസിഡന്റ് കരമന ജയനും വാര്ത്താ സമ്മേളനത്തില് പങ്കെടുത്തു.
