മോസ്കോ: റഷ്യയില് നിന്നും എണ്ണ വാങ്ങുന്നതുമായി ബന്ധപ്പെട്ട് യുഎസ് പ്രസിഡന്റ് ഡൊണാള്ഡ് ട്രംപ് വിമര്ശനങ്ങള് ഉന്നയിച്ചതിനുപിന്നാലെ ഭാരതത്തിന്റെ ദേശീയ സുരക്ഷാ ഉപദേഷ്ടാവ് അജിത് ഡോവല് റഷ്യയിലെത്തി. പ്രതിരോധം, ഊര്ജം തുടങ്ങിയ മേഖലകളിലെ ബന്ധം ശക്തമാക്കുന്നതിനായാണ് സന്ദര്ശനം. റഷ്യന് പ്രസിഡന്റ് വ്ളാദിമീര് പുടിന് അടക്കമുള്ള ഉന്നതപ്രതിനിധികളുമായി ഡോവല് കൂടിക്കാഴ്ച നടത്തും.
റഷ്യയും ഭാരതവും തമ്മിലുള്ള പ്രതിരോധ സഹകരണം ഡോവലിന്റെ ഈ സന്ദര്ശനത്തിലൂടെ ശക്തിയാര്ജ്ജിക്കുമെന്നാണ് വാര്ത്താ ഏജന്സിയായ ടാസ്സിന്റെ റിപ്പോര്ട്ടില് പറയുന്നത്. ഓപ്പറേഷന് സിന്ദൂറിനിടെ പാകിസ്ഥാന്റെ ഡ്രോണുകളേയും മിസൈലുകളെയും ചെറുത്ത എസ് -400 (സുദര്ശന് ചക്ര), എസ്യു- 57 യുദ്ധ വിമാനങ്ങള് വാങ്ങുന്നത് സംബന്ധിച്ചും ചര്ച്ച നടത്തുമെന്നും സൂചനയുണ്ട്.
2018 ഒക്ടോബറില് റഷ്യയില് നിന്ന് അഞ്ച് എസ്-400 മി സൈല് പ്രതിരോധ സംവിധാനങ്ങള് വാങ്ങുന്നതിനുള്ള 40,000 കോടി രൂപയുടെ കരാറില് ഭാരതം ഒപ്പുവെച്ചിരുന്നു. ആദ്യഘട്ടത്തില് മൂന്ന് എസ്-400 റഷ്യ ഭാരതത്തിന് കൈമാറിയിരുന്നു. എന്നാല് ഉക്രൈന്- റഷ്യ സംഘര്ഷത്തിന്റെ പശ്ചാത്തലത്തില് ബാക്കിയുള്ള സംവിധാനങ്ങളുടെ വിതരണം വൈകുകയായിരുന്നു.
വിദേശകാര്യമന്ത്രി ഡോ. എസ്. ജയശങ്കര് ഈ മാസം 27, 28 തീയതികളില് റഷ്യ സന്ദര്ശിക്കുന്നുണ്ട്. പ്രതിരോധം, ഊര്ജം, വ്യാപാരം എന്നീ വിഷയങ്ങളില് ജയശങ്കര് റഷ്യന് പ്രതിനിധികളുമായി ചര്ച്ച നടത്തും. റഷ്യന് വിദേശകാര്യമന്ത്രി സെര്ജി ലാവ്റോയമായും അദ്ദേഹം കൂടിക്കാഴ്ച നടത്തുമെന്ന് ഔദ്യോഗിക വൃത്തങ്ങള് അറിയിച്ചു.
