തിരുവനന്തപുരം: ഡിജിറ്റല് സര്വകലാശാല കരട് ഓര്ഡിനന്സിന് പിന്നില് സാമ്പത്തിക ക്രമക്കേട് അന്വേഷണം മുഖ്യമന്ത്രി പിണറായി വിജയനിലേക്ക് എത്താതിരിക്കാന്. ലോകായുക്ത മോഡല് ഭേദഗതി നീക്കം നടത്തിയത് വിസി നിയമനം സര്ക്കാരിന്റെ കൈപ്പിടിയിലാക്കാന്. ഡിജിറ്റല് സര്വകലാശാല വിസി നിയമനത്തിനുള്ള വകുപ്പ് 11ലെ മൂന്ന്, നാല്, ആറ് ഉപവകുപ്പുകളിലെ ഭേദഗതി കരട് ഓര്ഡിനന്സിനാണ് ഇന്നലെ ചേര്ന്ന മന്ത്രിസഭായോഗം അംഗീകാരം നല്കിയത്.
ഡിജിറ്റല് സര്വകലാശാലയിലെ പ്രോചാന്സിലര് മുഖ്യമന്ത്രിയാണ്. സര്വകലാശാലയില് നടന്ന കോടികളുടെ സാമ്പത്തിക ക്രമക്കേടില് സിഎജിയോട് അന്വേഷിക്കാന് ഗവര്ണര് ആവശ്യപ്പെട്ടിട്ടുണ്ട്. നിലവിലെ വൈസ് ചാന്സലര് ഡോ. സിസാ തോമസ് റിപ്പോര്ട്ട് ചെയ്തതിന്റെ അടിസ്ഥാനത്തിലായിരുന്നു ഗവര്ണറുടെ നടപടി. സിസ തോമസ് തുടരുകയോ അല്ലെങ്കില് സുപ്രീംകോടതി നിര്ദേശപ്രകാരം ഗവര്ണര് നിശ്ചയിക്കുന്നയാള് സ്ഥിരം വിസിയോ ആയി വന്നാല് സാമ്പത്തിക ക്രമക്കേടിന്റെ തെളിവുകള് മുഖ്യമന്ത്രിയിലേക്കും നീളുമെന്ന് വന്നതോടെയാണ് തിരക്കിട്ടുള്ള നിയമഭേദഗതിക്ക് ഒരുങ്ങുന്നത്.
