ഹർസിലി: ഉത്തരാഖണ്ഡിലെ ഉത്തരകാശിയിലെ ഹർസിലിനടുത്തുള്ള ധരാലി പ്രദേശത്ത് വൻ മേഘവിസ്ഫോടനത്തിൽ ഒരു ഗ്രാമം ഒലിച്ചുപോയി, നിരവധി പേരെ കാണാതായി. മേഘവിസ്ഫോടനത്തിന്റെ ഭയാനകമായ ദൃശ്യങ്ങൾ പുറത്തുവന്നു. വെള്ളപ്പൊക്കത്തിന്റെ ശക്തിയിൽ വീടുകൾ ഒഴുകിപ്പോകുന്നത് ദൃശ്യത്തിൽ കാണാം..എസ്ഡിആർഎഫ്, സൈന്യം, മറ്റ് ദുരന്ത നിവാരണ സംഘങ്ങൾ എന്നിവരെ സ്ഥലത്ത് എത്തിച്ചേർന്നിട്ടുണ്ട്. ഹർസിൽ മേഖലയിലെ ഖീർഗഢിൽ ജലനിരപ്പ് ക്രമാതീതമായി ഉയരുകയാണ്.
ചൊവ്വാഴ്ച ഉത്തരാഖണ്ഡിലെ ഒറ്റപ്പെട്ട സ്ഥലങ്ങളിൽ അതിശക്തമായ മഴ പെയ്യുമെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) പ്രവചിച്ചിരുന്നു. 25ഓളം ഹോട്ടലുകളും ഹോംസ്റ്റേകളും ഒലിച്ചുപോയിരിക്കാമെന്ന് വാർത്താ ഏജൻസികൾ റിപ്പോർട്ട് ചെയ്യുന്നു. ഈ മൺസൂൺ കാലത്ത് ഉത്തരാഖണ്ഡിൽ ശക്തമായ മഴ കനത്ത നാശമാണ് വിതച്ചത്. നദികളിലൂടെ ശക്തമായ ഒഴുക്ക് തുടരുകയാണ്. തിങ്കളാഴ്ച ഹൽദ്വാനിയ്ക്ക് സമീപം ഭഖ്ര അരുവിയുടെ ശക്തമായ ഒഴുക്കിൽ ഒരാൾ ഒഴുകിപ്പോയി, ഞായറാഴ്ച ഭുജിയാഗട്ടിന് സമീപം വീർത്ത അരുവിയിൽ രണ്ട് പേർ മുങ്ങിമരിച്ചു.
രുദ്രപ്രയാഗിലെ കുന്നിൻ ചെരുവിൽ നിന്ന് വീണ അവശിഷ്ടങ്ങൾക്കും പാറക്കെട്ടുകൾക്കും ഇടയിൽ രണ്ട് കടകൾ കുടുങ്ങിയതായും റിപ്പോർട്ടുകൾ ഉണ്ടായിരുന്നു.
