ന്യൂയോര്ക്ക് : യു. എസ്. സംസ്ഥാനമായ ഒഹായോയുടെ സോളിസിറ്റര് ജനറലായി ഇന്ത്യന് വംശജയായ അഭിഭാഷക മഥുര ശ്രീധരനെ നിയമിച്ചു. യുഎസ് സുപ്രീം കോടതി ഉള്പ്പെടെയുള്ള സംസ്ഥാന, ഫെഡറല് അപ്പീല് കോടതികള്ക്ക് മുമ്പാകെ മഥുര ഒഹായോയെ പ്രതിനിധീകരിക്കും
നിലവില് ഒഹായോയിലെ സോളിസിറ്റര് ജനറലിന്റെ ഓഫീസില് ഡെപ്യൂട്ടി സോളിസിറ്റര് ജനറലാണ്. 2018-ല് ന്യൂയോര്ക്ക് യൂണിവേഴ്സിറ്റി സ്കൂള് ഓഫ് ലോയില് നിന്ന് ജൂറിസ് ഡോക്ടര് (ജെഡി) നേടിയ മഥുര എംഐടിയില് നിന്ന് ഇലക്ട്രിക്കല് എഞ്ചിനീയറിംഗിലും കമ്പ്യൂട്ടര് സയന്സിലും ബിരുദാനന്തര ബിരുദം നേടിയിട്ടുണ്ട് . എംഐടിയില് നിന്ന് ഇലക്ട്രിക്കല് എഞ്ചിനീയറിംഗ് & കമ്പ്യൂട്ടര് സയന്സിലും സാമ്പത്തിക ശാസ്ത്രത്തിലും ഇരട്ട ബാച്ചിലേഴ്സ് ബിരുദങ്ങളും അവര് നേടി. കര്ണാടക സംഗീതജ്ഞയാണ്. ചെന്നൈയിലെ സംഗീത സഭകളില് അവര് പരിപാടി അവതരിപ്പിച്ചിട്ടുണ്ട്. അശ്വിന് സുരേഷാണ് ഭര്ത്താവ്.
