ഇസ്ലാമാബാദ് : പഹൽഗാമിലെ ഭീകരാക്രമണത്തിനും ഓപ്പറേഷൻ മഹാദേവിൽ കൊല്ലപ്പെട്ട ഭീകരർക്കും പാകിസ്ഥാനുമായി ബന്ധമുണ്ടെന്ന വാദങ്ങൾ പൂർണ്ണമായും നിരസിച്ച് പാകിസ്ഥാൻ. ഇസ്ലാമാബാദിൽ നടന്ന പത്രസമ്മേളനത്തിൽ പാകിസ്ഥാൻ വിദേശകാര്യ മന്ത്രാലയ വക്താവ് ഷഫ്ഖത്ത് അലി ഖാൻ ആണ് ഈ ആരോപണങ്ങൾ അടിസ്ഥാനരഹിതമാണെന്ന് പറഞ്ഞത്.
പഹൽഗാമിൽ ഭീകരാക്രമണം നടത്തിയ ഭീകരർക്കും ജൂലൈ 28 ന് ഓപ്പറേഷൻ മഹാദേവിൽ കൊല്ലപ്പെട്ട ഭീകരർക്കും പാകിസ്ഥാനുമായി ബന്ധമുണ്ടെന്ന് തെളിയിക്കാൻ ഇന്ത്യ ഇതുവരെ വ്യക്തമായ തെളിവുകൾ നൽകിയിട്ടില്ലെന്ന് ഷഫ്ഖത്ത് അലി ഖാൻ പറഞ്ഞു. ദാതിഗാം വനങ്ങളിൽ കൊല്ലപ്പെട്ട ഭീകരരെക്കുറിച്ച് ഇന്ത്യയുടെ ആഭ്യന്തര മന്ത്രി അമിത് ഷാ ഉന്നയിക്കുന്ന അവകാശവാദങ്ങൾ ഓപ്പറേഷൻ സിന്ദൂരിന് മുമ്പ് പഹൽഗാം ആക്രമണത്തെക്കുറിച്ച് ഇന്ത്യ ഉന്നയിച്ചതിന് സമാനമാണ്. ഇത് വിചിത്രമാണെന്നും ഇന്ത്യയിലെ പ്രതിപക്ഷ നേതാക്കൾ പോലും ഈ ചോദ്യം ചോദിക്കുന്നുണ്ടെന്നും ഷഫ്ഖത്ത് അലി ഖാൻ പറഞ്ഞു.
പഹൽഗാം ആക്രമണത്തിന്റെ വ്യക്തമായ തെളിവുകൾ നൽകാതെയോ വിശ്വസനീയമായ അന്വേഷണം നടത്താതെയോ ആണ് ഇന്ത്യ പാകിസ്ഥാനെ ആക്രമിച്ചതെന്ന് ലോകത്തിന് അറിയാമെന്ന് ഷഫ്ഖത്ത് അലി ഖാൻ പറഞ്ഞു. ഓപ്പറേഷൻ മഹാദേവ്നെക്കുറിച്ചുള്ള ഏതൊരു അവകാശവാദവും ഞങ്ങൾക്ക് പ്രശ്നമല്ല. ഇക്കാര്യത്തിൽ ഇന്ത്യൻ ആഭ്യന്തര മന്ത്രി നടത്തിയ അവകാശവാദങ്ങൾ കെട്ടിച്ചമച്ചതാണ്, ഇത് അദ്ദേഹത്തിന്റെ വിശ്വാസ്യതയെ ഗുരുതരമായ ചോദ്യങ്ങൾ ഉയർത്തുന്നു. ലോക്സഭയിൽ ചർച്ച ആരംഭിച്ച അതേ ദിവസം തന്നെ പഹൽഗാം ആക്രമണം നടത്തിയ തീവ്രവാദികൾ കൊല്ലപ്പെട്ടത് യാദൃശ്ചികമല്ലെന്നും ഷഫ്ഖത്ത് അലി ഖാൻ കൂട്ടിച്ചേർത്തു.
ഷഫ്ഖത്ത് അലി ഖാന് പുറമെ ഇന്ത്യയിലെ പാകിസ്ഥാൻ ഹൈക്കമ്മീഷണറായിരുന്ന നയതന്ത്രജ്ഞൻ അബ്ദുൾ ബാസിതും ഇതേ ചോദ്യങ്ങൾ ഉന്നയിച്ചു. ഇന്ത്യയ്ക്ക് വിശ്വാസ്യതയില്ലെന്ന് ഒരു ടിവി പരിപാടിയിൽ അബ്ദുൾ ബാസിത് പറഞ്ഞു. പഹൽഗാം ആക്രമണവും പാകിസ്ഥാനും തമ്മിലുള്ള ബന്ധത്തിന് ഇന്ത്യയ്ക്ക് ശക്തമായ തെളിവുകളുണ്ടെങ്കിൽ, ആ തെളിവുകളെല്ലാം ലോകത്തിന് മുന്നിൽ കാണിക്കണം. പഹൽഗാം ആക്രമണത്തിൽ പാകിസ്ഥാന്റെ പങ്കാളിത്തത്തെക്കുറിച്ച് ഇന്ത്യ ആദ്യം അടിസ്ഥാനരഹിതമായ ആരോപണങ്ങൾ ഉന്നയിച്ചുവെന്നും ഇപ്പോൾ മൂന്ന് തീവ്രവാദികളെ കൊന്നതിനുശേഷം അവർ പാകിസ്ഥാനികളാണെന്ന് അവകാശപ്പെടുന്നുണ്ടെന്നും അബ്ദുൾ ബാസിത് പറഞ്ഞു.
