ഗുവാഹത്തി : ആൾക്കൂട്ടത്തിനിടെയിലും ശാരീരിക അവശതകൾ മാറ്റി വച്ച് തന്നെ കാണാനെത്തിയ ദിവ്യാംഗന് ഇലക്ട്രിക് വീൽ ചെയർ സമ്മാനിച്ച് അസം മുഖ്യമന്ത്രി ഹിമന്ത ബിശ്വ ശർമ്മ . സോഷ്യൽ മീഡിയ പ്ലാറ്റ്ഫോമായ എക്സിൽ ഇതിന്റെ വീഡിയോ ഹിമന്ത ബിശ്വ ശർമ്മ തന്നെയാണ് പങ്ക് വച്ചത്.
“അടുത്തിടെ ഞാൻ എന്റെ ദിവ്യാംഗ സുഹൃത്ത് അബ്ദുളിനെ കണ്ടപ്പോൾ, അദ്ദേഹം ഒരു ബാറ്ററി വീൽചെയർ ആവശ്യപ്പെട്ടു. അദ്ദേഹത്തിന്റെ അഭ്യർത്ഥന ഞാൻ എങ്ങനെ സ്വീകരിക്കാതിരിക്കും? അബ്ദുൾ, സന്തോഷിക്കൂ. ഈ സൗകര്യം നിങ്ങളുടെ ജീവിതത്തിൽ വലിയ മാറ്റം കൊണ്ടുവരുമെന്ന് പ്രതീക്ഷിക്കുന്നു.”എന്നാണ് ഹിമന്ത ശർമ്മയുടെ കുറിപ്പ്.
ദിവസങ്ങൾക്ക് മുൻപ് നടന്ന പൊതുസമ്മേളനത്തിനിടെ ജനക്കൂട്ടത്തിനിടയിൽ നിലത്തിരുന്ന വികലാംഗനായ അബ്ദുൾ മോസ അലിയോട് മുഖ്യമന്ത്രി സംസാരിച്ചിരുന്നു . നിങ്ങൾക്ക് എന്താണ് വേണ്ടതെന്ന് മുഖ്യമന്ത്രി ചോദിച്ചപ്പോൾ, അബ്ദുൾ ഇലക്ട്രിക് വീൽചെയറാണ് ചോദിച്ചത്. അബ്ദുളിന്റെ പേരും മൊബൈൽ നമ്പറും എഴുതാൻ മുഖ്യമന്ത്രി ഉദ്യോഗസ്ഥരോട് പറഞ്ഞു.
അതിനു പിന്നാലെയാണ് അബ്ദുളിന് ഇലക്ട്രിക് വീൽചെയർ ലഭിച്ചത്. “സത്യം പറഞ്ഞാൽ, ഞാൻ വളരെ സന്തോഷവാനും നന്ദിയുള്ളവനുമാണ്. ദൈവം അദ്ദേഹത്തെ അനുഗ്രഹിക്കട്ടെ.”എന്നാണ് അബ്ദുൾ പറയുന്നത് .
