ആലപ്പുഴ : ചേര്ത്തലയില് മൃതദേഹാവശിഷ്ടങ്ങള് കണ്ടെത്തിയ സംഭവത്തിന്റെ പശ്ചാത്തലത്തില് സമീപ ജില്ലകളില് നിന്ന് കാണാതായ എല്ലാ സ്ത്രീകളുടെയും വിവര ശേഖരണം നടത്താനുള്ള നീക്കത്തില് പൊലീസ്.
ഏറ്റുമാനൂര് സ്വദേശിനി ജെയിനമ്മ മാത്യുവിന്റെ തിരോധാനവുമായി ബന്ധപ്പെട്ട് അറസ്റ്റിലായ റിയല് എസ്റ്റേറ്റ് ഇടപാടുകാരന് സി.എം. സെബാസ്റ്റ്യന് സീരിയല് കില്ലറെന്നാണ് പൊലീസ് സംശയിക്കുന്നത്. ഇയാളുടെ പള്ളിപ്പുറത്തുള്ള പുരയിടം കുഴിച്ചപ്പോള് തലയോട്ടി, തുടയെല്ല്, ക്ലിപ്പിട്ട പല്ലിന്റെ അവശിഷ്ടം എന്നിവ ലഭിച്ചിരുന്നു. എന്നാല് ജെയ്നമ്മയ്ക്ക് ക്ളിപ്പിട്ട പല്ലുണ്ടായിരുന്നില്ല. ഇതാണ് മറ്റു സ്ത്രീകളുമായി ഇയാള്ക്ക് ബന്ധമുണ്ടായിരുന്നുവെന്ന സൂചനകളിലേക്ക് നയിച്ചത്.
അവശിഷ്ടങ്ങളുടെ ഡി.എന്.എ ഫലത്തിനു കാക്കുകയാണ് പൊലീസ്. കടക്കരപ്പള്ളി സ്വദേശി ബിന്ദു പദ്മനാഭന് , വള്ളാക്കുന്നത്തുവെളി സിന്ധു , വാരനാട് വെളിയില് ഐഷ എന്നിവരുടെ തിരോധാനത്തിലും സെബാസ്റ്റ്യനെ ക്രൈംബ്രാഞ്ച് സംശയിക്കുന്നുണ്ട്. ഇതില് ഐഷയ്ക്ക് ക്ളിപ്പിട്ട പല്ലുണ്ടായിരുന്നു. ഇതിനാല് ഐഷയുടെ മകളുടെ രക്തസാമ്പിളും ഡി.എന്.എ പരിശോധനയ്ക്കായി അയച്ചിട്ടുണ്ട്.
