കൊച്ചി: പകല് ജോലി ചെയ്ത് വൈകിട്ട് ഒന്നുറങ്ങാന് കൊതിച്ചതുപോലെ വിട പറയണം എന്ന് ഏറെ ആഗ്രഹിച്ച് അക്കാര്യങ്ങള് തന്റെ രചനയില് കുറിച്ചാണ് പ്രൊഫ. എം.കെ. സാനു വിടപറഞ്ഞത്. എഴുത്തുകാരന്, ചിന്തകന്, വാഗ്മി, അധ്യാപകന്, സാമൂഹ്യപ്രവര്ത്തകന് എന്നീ നിലകളില് പ്രവര്ത്തിച്ച അദ്ദേഹം നിയമസഭയിലും സാന്നിധ്യം അറിയിച്ചിട്ടുണ്ട്. 98 കാരനായ അദ്ദേഹം ദിവസങ്ങള്ക്ക് മുന്പ് വരെ പൊതുവേദികളില് സജീവമായിരുന്നു. വീട്ടിലെ ശുചിമുറിയില് വീണ് പരിക്കേറ്റ് അമൃത ആശുപത്രിയില് ചികിത്സയിലിരിക്കെ ശനിയാഴ്ച വൈകിട്ടാണ് മരണം സംഭവിച്ചത്. വീഴ്ചയില് ഇടുപ്പെല്ലിന് പരിക്കേറ്റതിനെ തുടര്ന്ന് ശസ്ത്രക്രിയ നടത്തിയിരുന്നു. ഇതിനിടെ ന്യുമോണിയ ബാധിച്ചതോടെ ആരോഗ്യ നില വഷളാവുകയായിരുന്നു.
മുഖ്യമന്ത്രി പിണറായി വിജയന്, പ്രതിപക്ഷ നേതാവ് വി.ഡി. സതീശന്, മന്ത്രിമാരായ എം.ബി. രാജേഷ്, പി. രാജീവ്, കെ. രാജന്, റോഷി അഗസ്റ്റിന്, ആര്. ബിന്ദു, വി.എന്. വാസവന്, പി. പ്രസാദ്, ഗോവ മുന് ഗവര്ണര് പി.എസ്. ശ്രീധരന് പിള്ള, ആര്എസ്എസ് ദക്ഷിണ കേരള പ്രാന്ത പ്രചാര്പ്രമുഖ് എം. ഗണേശന്, എറണാകുളം നഗര് സംഘചാലക് അഡ്വ. ടി.സി. കൃഷ്ണ, ബിജെപി ലീഗല് സെല് സംസ്ഥാന കണ്വീനര് അഡ്വ. പി. കൃഷ്ണദാസ്, സംസ്കാര് ഭാരതി ദേശീയ സമിതിയംഗം ലക്ഷ്മിനാരായണന്, തപസ്യ ജില്ലാ സെക്രട്ടറി രാജീവ് കെ.വി, ബിജെപി എറണാകുളം സിറ്റി ജില്ലാ പ്രസിഡന്റ് അഡ്വ. കെ.എസ്. ഷൈജു, വ്യവസായ സെല് സംസ്ഥാന സഹസംയോജകന് പി.വി. അതികായന്, ബിജെപി സംസ്ഥാന സമിതിയംഗം സി.ജി. രാജഗോപാല് തുടങ്ങിയവര് വീട്ടിലും ടൗണ് ഹാളിലുമെത്തി ആദരാഞ്ജലികള് അര്പ്പിച്ചു.
