ന്യൂദല്ഹി: ഓപ്പറേഷന് സിന്ദൂറിന് ശേഷം ഇന്ത്യയുടെ പടയൊരുക്കും ശക്തമാകുന്നു. ഏറ്റവുമൊടുവില് ഇന്ത്യയില് സ്പെയിനില് നിന്നുള്ള 16ഓളം സി-295 വിഭാഗത്തില്പ്പെട്ട സൈനിക ചരക്ക് ഗതാഗതത്തിനുള്ള വിമാനം എത്തി. മിലിറ്ററി ട്രാന്സ്പോര്ട്ട് എയര്ക്രാഫ്റ്റ് എന്ന വിഭാഗത്തിലാണ് സി295 ഉള്പ്പെടുക. ഇനി ഏത് പ്രാന്തപ്രദേശത്തും മുക്കുമൂലയിലും പട്ടാളക്കാരെയും പടക്കോപ്പുകളും എത്തിക്കാനാകും എന്നതാണ് സി295ന്റെ പ്രത്യേകത.
2021ല് ഒപ്പുവെച്ച കരാര് അനുസരിച്ച് ഇന്ത്യയ്ക്ക് 56 സി295 മിലിറ്ററി ട്രാന്സ്പോര്ട്ട് എയര്ക്രാഫ്റ്റുകളാണ് സ്പെയിന് നല്കേണ്ടത്. ഇതില് സ്പെയിനില് നിര്മ്മിച്ച 16 എണ്ണം സി295 ഇന്ത്യയില് കഴിഞ്ഞ ദിവസം എത്തിച്ചപ്പോള് ബാക്കി 40 എണ്ണം ഇന്ത്യയില് സ്പെയിനിന്റെ സഹായത്തോടെ തദ്ദേശീയമായി നിര്മ്മിക്കും. ഗൂജറാത്തിലെ ടാറ്റാ അഡ്വാന്സ്ഡ് സിസ്റ്റംസ് ലിമിറ്റഡിലായിരിക്കും ഈ മെയ്ക്ക് ഇന് ഇന്ത്യ സംരംഭത്തിന് വേദിയാകുക. . ഭാരത് ഇലക്ട്രോണിക്സിന്റെ കൂടി സഹായം ഈ നിര്മ്മാണപദ്ധതിയില് ഉണ്ടാകും.
വാസ്തവത്തില് സെപ്തംബറില് നല്കേണ്ട 16 സി-295 വിമാനങ്ങള് രണ്ട് മാസം നേരത്തെ ജൂലായില് തന്നെ സ്പെയിന് ഇന്ത്യയ്ക്ക് നല്കുകയായിരുന്നു. ഇതോടെ പട്ടാളക്കാരെയും പടക്കോപ്പുകളും ഒരിടത്ത് നിന്നും മറ്റൊരിടത്തേക്ക് എത്തിക്കാന് ഇന്ത്യ ഉപയോഗിച്ചിരുന്ന പഴക്കം ചെന്ന അവ്റോ എന്ന വിമാനപ്പടയില് നിന്നും ഇന്ത്യയ്ക്ക് മോചനം കിട്ടും. പുതിയ സി295 കൂറെക്കൂടി കാര്യക്ഷമമാണ്. 5 മുതല് 10 ടണ് വരെ ആയുധങ്ങളും ചരക്കും വഹിക്കാന് സി295ന് ശേഷിയുണ്ട്. ഒറ്റയടിക്ക് താഴെയിറങ്ങാതെ 11 മണിക്കൂര് നേരം പറക്കാനും സി295ന് ശേഷിയുണ്ട്. നിലത്ത് കല്ല് പാകാത്ത പരുക്കന് പ്രതലത്തിലൂടെയും സി295ന് കുതിച്ചുയരാന് സാധിക്കുമെന്നതിന്റെ അര്ത്ഥം ഏത് വിപരീത സാഹചര്യത്തിലും ചരക്കുകളും പടക്കോപ്പുകളും പട്ടാളക്കാരെയും ഒരിടത്ത് നിന്നും വേറൊരിടത്തേക്ക് എത്തിക്കാന് സാധിക്കും.
ഇന്ത്യന് പ്രതിരോധ സേനയ്ക്ക് വന്മുതല്ക്കൂട്ടായിരിക്കും സി-295. എന്തായാലും ഓപ്പറേഷന് സിന്ദൂറിന് ശേഷം ഇന്ത്യന് സൈന്യത്തെ കേന്ദ്രം അതിശക്തവും ആധുനികവും ആക്കി മാറ്റുകയാണ്. ഇന്ത്യയില് നിര്മ്മിക്കുന്ന ആയുധങ്ങള് തന്നെ കൂടുതല് ശക്തമാക്കുകയാണ്. ബ്രഹ്മോസ് എന്ജിയും പുതിയ പിനാകയും ഒരുങ്ങുന്നുണ്ട്. എസ് 400നേക്കാള് ശക്തിയുള്ള വ്യോമപ്രതിരോധസംവിധാനം 2028ലെങ്കിലും പുറത്തിറക്കാന് ശ്രമം നടക്കുന്നുണ്ട്. അമേരിക്കയില് നിന്നും ചോപ്പര് വിഭാഗത്തില്പെട്ട മൂന്ന് അപാച്ചെ ഹെലികോപ്റ്ററുകള് എത്തിയത് കഴിഞ്ഞ ദിവസമാണ്.
