ന്യൂദല്ഹി: ലൗജിഹാദിന്റെയും സംഘടിത മതംമാറ്റത്തിന്റെയും ഭീകരവാദത്തിന്റെയും ആഴങ്ങളെക്കുറിച്ച് പറഞ്ഞ ദി കേരള സ്റ്റോറി ദേശീയ തലത്തില് തന്നെ ഏറെ ചര്ച്ച ചെയ്യപ്പെട്ട ചിത്രമാണ്. ചിത്രത്തിന്റെ സംവിധായകന് സുദീപ്തോ സെന് മികച്ച സംവിധായകനായി തെരഞ്ഞെടുക്കപ്പെട്ടതിലൂടെ ചിത്രം വീണ്ടും ചര്ച്ച ചെയ്യപ്പെടുകയാണ്. ചിത്രത്തിന്റെ സംവിധായകന് എന്ന നിലയില് വധഭീഷണി ഉള്പ്പെടെ സെന്നിനുനേരെ ഉയര്ന്നിരുന്നു.
ചിത്രം കേരളത്തിന് എതിരല്ലെന്ന് സംവിധായകന് നിരവധി തവണ വ്യക്തമാക്കിയിട്ടുണ്ട്. കേരളത്തിന്റെ സമ്പന്നമായ സംസ്കാരത്തെയും പാരമ്പര്യത്തെയും ആരാധിക്കുന്നുണ്ട്. എന്നാല് ചില രാഷ്ട്രീയപാര്ട്ടികള് സ്വീകരിക്കുന്ന പ്രീണനനയത്തെയും തെറ്റായ പ്രവണതകളെയും എതിര്ക്കാതിരിക്കാനാവില്ല. ഒരു കലാകാരനെന്ന നിലയില്, സത്യം കഴിയുന്നത്ര ഉച്ചത്തില് പറയേണ്ടത് തന്റെ കടമയാണെന്ന് കരുതുന്നു, എന്ത് സംഭവിച്ചാലും അത് ചെയ്യുമെന്നും അദ്ദേഹം നേരത്തെ വ്യക്തമാക്കിയിട്ടുണ്ട്.
സുദീപ്തോ സെനും ജെ.കെ. അംബികയും ചേര്ന്നെഴുതിയ ദി അണ്ടോള്ഡ് കേരള സ്റ്റോറി എന്ന പുസ്തകം ഈയിടെ പ്രകാശനം ചെയ്തിരുന്നു. കേരളത്തില് അറിയപ്പെടുന്ന കേസുകളുടെ അടിസ്ഥാനത്തില് രചിച്ച പുസ്തകത്തില് ദി കേരള സ്റ്റോറിയില് ഉള്ക്കൊള്ളിക്കാന് കഴിയാത്ത കാര്യങ്ങള് ഉള്പ്പെടുത്തിയിട്ടുണ്ടെന്നും രചയിതാക്കള് വ്യക്തമാക്കിയിരുന്നു.
