ന്യൂദല്ഹി: കെസിബിസി ഏല്പ്പിച്ച ദൗത്യം തങ്ങള് ആത്മാര്ഥമായി ചെയ്തുവെന്ന് ബിജെപി സംസ്ഥന വൈസ് പ്രസിഡന്റ് ഷോണ് ജോര്ജും ജനറല് സെക്രട്ടറി അനൂപ് ആന്റണിയും.
കന്യാസ്ത്രീമാര്ക്ക് ജാമ്യം കിട്ടിയതിനോട് പ്രതികരിക്കുകയായിരുന്നു അവര്. കഴിഞ്ഞ എട്ടു ദിവസമായി രാജീവ് ചന്ദ്രശേഖറിന്റെ നേതൃത്വത്തില് ഒരു സംഘമുണ്ടാക്കി ഞങ്ങള് അവരുടെ മോചനത്തിനായി പ്രവര്ത്തിക്കുകയായിരുന്നു. ഞങ്ങളെ സഹായിച്ച എല്ലാവര്ക്കും, പ്രത്യേകിച്ച് പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ, ഛത്തീസ്ഗഡ് മുഖ്യമന്ത്രി, ആഭ്യന്തരമന്ത്രി തുടങ്ങി എല്ലാവര്ക്കും നന്ദി. വിഷയത്തില് പ്രധാനമന്ത്രി പ്രത്യേക താല്പര്യം എടുത്താണ് പ്രവര്ത്തിച്ചത്. മോദി, അമിത് ഷാ എന്നിവരെ പാര്ട്ടി സംസ്ഥാന അധ്യക്ഷന് രാജീവ് ചന്ദ്രശേഖര് മൂന്നു പ്രാവശ്യം ദല്ഹിയില് കണ്ട് കാര്യങ്ങള് ബോധിപ്പിച്ചു.
ഞങ്ങള് ഒരുപാട് കല്ലേറ് കൊണ്ടു. ചെളിവാരിയേറ് സഹിച്ചു. പക്ഷെ ഏറ്റെടുത്ത ദൗത്യത്തില് നിന്ന് രാജീവ് ചന്ദ്രശേഖര് പിന്നാക്കം പോയില്ല. ഒരു നിയമ പ്രശ്നം കൊണ്ട് ഉണ്ടായ ഒരു വിഷയം. അത് നിയമത്തിന്റെ വഴിയിലൂടെ തന്നെ പരിഹരിച്ചു. നിയമപരമായി ചെയ്യേണ്ടത് എല്ലാം ഞങ്ങള് ചെയ്തിട്ടുണ്ട്. ഇടതുപക്ഷക്കാരും കോണ്ഗ്രസും അല്ലാത്തവര്ക്ക് കഴിഞ്ഞദിവസം കോടതിയില് എന്താണ് സംഭവിച്ചതെന്ന് ബോധ്യപ്പെട്ടിട്ടുണ്ട്. ഞങ്ങള്ക്ക് ഒരു ക്രെഡിറ്റും വേണ്ട. കേന്ദ്ര പിന്തുണയില്ലാതെ ഇതൊന്നും സാധിക്കില്ല.
2021ല് ഇതേ സംസ്ഥാനത്ത് നാലു പുരോഹിതര് ജയിലില് കിടന്നു. ഇവരാരും (കോണ്ഗ്രസ്, സിപിഎം നേതാക്കള്) കണ്ടില്ലല്ലോ.? ഛത്തീസ്ഗഡിലെ കോണ്ഗ്രസ് പ്രസിഡന്റിന്റെ നിലപാട് എന്താണ്? അദ്ദേഹം എന്താ ഒന്നും പറയാത്തെ, അതെന്താ ആരും ചര്ച്ച ചെയ്യാത്തത്? അവര് ചോദിച്ചു. ഛത്തീസ്ഗഡില് മനുഷ്യക്കടത്തും നിര്ബന്ധിത മതപരിവര്ത്തനങ്ങളുമുണ്ടെന്ന് ഷോണ് ജോര്ജ്. അത് ഒരു സത്യമാണ്. നൂറു ശതമാനം സത്യമാണ്. അദ്ദേഹം പറഞ്ഞു.
