ന്യൂദല്ഹി: കന്യാസ്ത്രീകള്ക്ക് ജാമ്യം ലഭിച്ചതില് സന്തോഷമുണ്ടെന്ന് ബിജെപി ദേശീയ നിര്വാഹക സമിതിയംഗം കുമ്മനം രാജശേഖരന്. നീതിയുടെ ഭാഗത്താണ് ബിജെപി. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് നിരന്തരം ആശയവിനിമയം നടത്തിയിരുന്നു. കുമ്മനം ദല്ഹിയില് മാധ്യമങ്ങളോട് പറഞ്ഞു.
രാജീവ് ചന്ദ്രശേഖര്, ഷോണ് ജോര്ജ്, അനൂപ് ആന്റണി എന്നിവര്ക്കും നന്ദി അറിയിക്കുന്നു. ഛത്തീസ്ഗഡില് കോണ്ഗ്രസ് സര്ക്കാര് ഭരിക്കുമ്പോള് കന്യാസ്ത്രീകള്ക്കും പുരോഹിതന്മാര്ക്കും നേരെ സമാന സംഭവമുണ്ടായിട്ടുണ്ടെന്നും അദ്ദേഹം പറഞ്ഞു.
കേരളത്തില് നിന്ന് പോയ കന്യാസ്ത്രീകള്ക്ക് നീതിവാങ്ങി കൊടുക്കേണ്ടത് ബിജെപിയുടെ കടമയാണെന്ന് ബോധ്യപ്പെട്ടതിനാലാണ് മനുഷ്യത്വപരമായ ഇടപെടല് നടത്തിയത്. രാജീവ് ചന്ദ്രശേഖര് പ്രധാനമന്ത്രിയെ കണ്ടു, ആഭ്യന്തരമന്ത്രി അമിത് ഷായെ കണ്ടു. അവരുമായിട്ടെല്ലാം നിരന്തരം ആശയവിനിമയം നടത്തി. രാഷ്ട്രീയ പാര്ട്ടി എന്ന നിലയില് ഇക്കാര്യത്തില് നിരന്തരമായി ഇടപെട്ടിരുന്ന പാര്ട്ടി ബിജെപി മാത്രമാണ്. രാജീവ് ചന്ദ്രശേഖര് ഛത്തീസ്ഗഡിലെത്തി ബന്ധപ്പെട്ടവരെ കണ്ടു. ഈ പ്രശ്നം രമ്യമായി പരിഹരിക്കാനാണ് ബിജെപി പ്രവര്ത്തിക്കുന്നത്.
കന്യാസ്ത്രീകള്ക്ക് നീതി ലഭിക്കാന് ഏതറ്റംവരെയും പോകാന് ബിജെപി തയാറായിരുന്നു. കേസിനെ കുറിച്ച് പിന്നീട് ചര്ച്ചകള് നടത്തും. കോണ്ഗ്രസ് സര്ക്കാര് ഭരിക്കുന്ന കാലത്ത് ഇത്തരം സംഭവങ്ങള് ഉണ്ടായിട്ടുണ്ട്. അന്ന് അവരെ പുറത്തുകൊണ്ടുവരുന്നതിനെ കുറിച്ചോ കേസിനെ കുറിച്ചോ ആരും ചര്ച്ച ചെയ്തിട്ടില്ല. ബിജെപി ഭരിക്കുന്നതിനാലാണ് ഇത്തരം വിവാദങ്ങള് ഉണ്ടാവുന്നത്. ക്രൈസ്തവ ജനതയെ സ്നേഹത്തോടെയും ആദരവോടെയും കണ്ട് മുന്നോട്ട് പോകാന് തന്നെയാണ് ബിജെപിയുടെ തീരുമാനമെന്നും കുമ്മനം പറഞ്ഞു.
