തിരുവനന്തപുരം: ഓപ്പറേഷന് തിയേറ്ററിലെ ഉപകരണം കാണാനില്ലെന്ന് പറഞ്ഞ് ഡോ. ഹാരിസിനെ കുടുക്കാനുള്ള മന്ത്രി വീണ ജോര്ജിന്റെ പ്രതികാര നീക്കം പൊളിയുന്നു. ഉപകരണം അവിടെത്തന്നെയുണ്ടെന്ന് വ്യക്തമാക്കി ഡോ. ഹാരിസ് ചിറയ്ക്കല് രംഗത്തുവന്നു. പരിചയക്കുറവ് കാരണം ഉപകരണം മാറ്റിവച്ചിരിക്കുകയാണ്. ഏത് അന്വേഷണത്തെയും സ്വാഗതം ചെയ്യുന്നതായി ഡോക്ടര് പറഞ്ഞു.
താന് ചുമതലയേറ്റെടുക്കുന്നതിന് മുമ്പുണ്ടായിരുന്ന ഡോക്ടര് ആണ് ഉപകരണം വരുത്തിച്ചത്. അദ്ദേഹത്തിന് ഉപകരണം ഉപയോഗിക്കുന്നതില് പരിചയമുണ്ടായിരുന്നു. ബെംഗളൂരുവില് നിന്നുള്ള വിദഗ്ധനൊപ്പം ചേര്ന്ന് ഒരു രോഗിയെ ആ ഉപകരണം കൊണ്ട് ചികിത്സിപ്പിച്ചു. എന്നാല് ശസ്ത്രക്രിയ ഭയങ്കരമായ സങ്കീര്ണതയിലേക്ക് നീങ്ങി. ആ ഉപകരണം വെച്ച് ശസ്ത്രക്രിയ ചെയ്യാനുള്ള പരിചയം ഇല്ലാത്തതുകൊണ്ട് ഉപയോഗിക്കാറില്ല. പരിശീലനം കിട്ടാത്തതിനാലാണ് ഉപകരണം ഉപയോഗിക്കാത്തത്.
ഓപ്പറേഷന് തിയേറ്ററിലെ ഉപകരണങ്ങള് സംബന്ധിച്ച് എല്ലാ വര്ഷവും ഓഡിറ്റ് നടത്താറുണ്ട്. ഉപകരണം മാറ്റിവെച്ചിരിക്കുന്നത് സംബന്ധിച്ച് കളക്ടര്ക്ക് റിപ്പോര്ട്ട് നല്കിയിട്ടുണ്ടെന്നും അദ്ദേഹം പറഞ്ഞു. 20 ലക്ഷം രൂപയുടെ ഓസിലോസ്കോപ്പ് ഉപകരണം കാണാതായെന്ന് അന്വേഷണ കമ്മിഷന് റിപ്പോര്ട്ടില് പറയുന്നുവെന്ന് മന്ത്രി വീണ ജോര്ജ് വ്യക്തമാക്കിയിരുന്നു. എന്നാല് ഓപ്പറേഷന് തിയേറ്ററില് കയറി പരിശോധിക്കണമെങ്കില് ആശുപത്രി സൂപ്രണ്ടിന്റെയും വകുപ്പ് മേധാവിയുടെയും അനുമതി വേണം. അതൊന്നും ഉണ്ടായില്ല. ഡോക്ടറെ കുടുക്കാനുള്ള തട്ടിക്കൂട്ട് റിപ്പോര്ട്ടാണ് മന്ത്രിയുടെ നിര്ദേശപ്രകാരം തയാറാക്കിയതെന്ന് വ്യക്തം.
