കൊച്ചി: സ്ത്രീധന നിരോധന നിയമപ്രകാരമുള്ള പരാതിയില്, പരാതിക്കാരി താമസിക്കുന്ന സ്ഥലത്തെ മജിസ്ട്രേറ്റിനും കേസെടുക്കാന് ബാധ്യതയുണ്ടെന്ന് ഹൈക്കോടതി വ്യക്തമാക്കി. സ്ത്രീധനം ആവശ്യപ്പെടുകയോ കൈപ്പറ്റുകയോ ചെയ്ത സ്ഥലത്തുള്ള മജിസ്ട്രേറ്റിനു മാത്രമല്ല പരാതിക്കാരി എവിടെയാണോ താമസിക്കുന്നത് അവിടുത്തെ മജിസ്ട്രേറ്റിനും കേസെടുക്കാം, ഹൈക്കോടതി ചൂണ്ടിക്കാട്ടി.
തിരുവല്ലാക്കാരിയായ യുവതി നല്കിയ ഹര്ജിയിലാണ് സുപ്രധാനവിധി. യുവതി വടക്കന് പറവൂര് സ്വദേശിയേയാണ് വിവാഹം കഴിച്ചത്. വിവാഹത്തോടനുബന്ധിച്ച് തിരുവല്ലയില് വച്ച് ഭര്ത്താവും ബന്ധുക്കളും 150 പവന് സ്വര്ണം സ്ത്രീധനമായി ആശ്യപ്പെട്ടു. അവര് അത് ഭര്ത്താവിന്റെ വീട്ടില് വച്ച് യുവതിയില് നിന്ന് കരസ്ഥമാക്കുകയും ചെയ്തു. വിവാഹബന്ധം തകര്ന്നതോടെ സ്ത്രീധനം മടക്കി ആവശ്യപ്പെട്ട് യുവതി, മാവേലിക്കര ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയില് ഹര്ജി നല്കി. വിവാഹ ബന്ധം തകര്ന്നതിനാല് മാനസിക സമ്മര്ദ്ദം ഉള്ളതിനാല് കുടുംബ വീട്ടില് താമസിക്കാതെ മാവേലിക്കരയിലെ ബന്ധു വീട്ടിലാണ് താമസിച്ചിരുന്നത്. അതിനാലാണ് മാവേലിക്കര കോടതിയില് ഹര്ജി നല്കിയത്. എന്നാല് കുറ്റകൃത്യം നടന്നത് തിരുവല്ലയില് ആയതിനാല് അവിടെ ഹര്ജി നല്കണമെന്നു പറഞ്ഞ് മാവേലിക്കര കോടതി ഹര്ജി മടക്കി. ഇതു ചോദ്യം ചെയ്താണ് ഹൈക്കോടതിയെ സമീപിച്ചത്. മാനസിക സമ്മര്ദം മൂലമാണ് ബന്ധുവീട്ടില് താമസിച്ച് ഹര്ജി നല്കിയതെന്ന വാദം അംഗീകരിച്ച ഹൈക്കോടതി, മജിസ്ട്രേറ്റിന്റെ ഉത്തരവ് റദ്ദാക്കി. കേസ് വീണ്ടും ഫയലില് സ്വീകരിച്ച് നിയമപരമായി നീങ്ങാന് ഹൈക്കോടതി മാവേലിക്കര മജിസ്ട്രേറ്റിനോട് ഉത്തരവിട്ടു. ഹര്ജിക്കാരിക്കു വേണ്ടി ആര്. പദ്മകുമാര്, പി.എസ് നിഷില് എന്നിവര് ഹാജരായി.
