മുംബൈ: ടാറ്റാ മോട്ടോഴ്സ് യൂറോപ്പില് ഇനി വാണിജ്യ വാഹനങ്ങളുടെ രംഗത്ത് രാജാവായി മാറാന് പദ്ധതി. 38000 കോടി രൂപയ്ക്കാണ് (450 കോടി ഡോളര്) ടാറ്റാ മോട്ടോഴ്സ് വിവിധ യൂറോപ്യന് രാജ്യങ്ങളില് സാന്നിധ്യമുള്ള ഇവെകോയെ വാങ്ങുന്നതിനുള്ള നിര്ദേശം ടാറ്റാ മോട്ടോഴ്സ് മുന്നോട്ട് വെച്ചിരിക്കുന്നത്. അന്തിമധാരണയായിട്ടില്ല.
യാഥാര്ത്ഥ്യമായാല്, 2008ല് ഫോര്ഡില് നിന്നും ബ്രിട്ടനിലെ കാര് നിര്മ്മാണക്കമ്പനിയായ ജാഗ്വാര് ലാന്റ് റോവറിനെ ഏറ്റെടുത്തതിനേക്കാള് വലിയ ഡീല് ആയി ഇത് മാറും. അന്ന് 280 കോടി ഡോളറിനാണ് രത്തന് ടാറ്റ നേരിട്ടെത്തി ജാഗ്വാര് ലാന്റ് റോവല് കമ്പനിയെ വിലയ്ക്ക് വാങ്ങിയത്.
ഇറ്റലിയിലെ ടുറിന് ആസ്ഥാനമായ കമ്പനിയാണ് വാണിജ്യവാഹനങ്ങള് നിര്മ്മിക്കുന്ന ഇവെകോ. ലൈറ്റ്, മീഡിയം, ഹെവി കൊമേഴ്സ്യൽ വാഹനങ്ങൾ രൂപകൽപ്പന ചെയ്യുകയും നിർമ്മിക്കുകയും ചെയ്യുന്നു. ട്രക്കുകള്,ലോറികള്, ബസുകള് എന്നിവ നിര്മ്മിക്കുന്നു. പ്രതിരോധ ആവശ്യങ്ങള്ക്കുള്ള വാഹനങ്ങളും നിര്മ്മിക്കും. ആംസ്റ്റര്ഡാമില് രജിസ്റ്റര് ചെയ്ത ഈ കമ്പനി വാണിജ്യ വാഹനങ്ങളുടെ കാര്യത്തില് യൂറോപ്പിലെ തന്നെ വലിയ ബ്രാന്റാണ്. വാണിജ്യ വാഹനങ്ങളുടെ രംഗത്ത് ഒരു ആഗോളബ്രാന്റ് സൃഷ്ടിക്കുകയാണ് ഈ ഏറ്റെടുക്കലിന്റെ പിന്നിലെ ലക്ഷ്യം. തല്ക്കാലം ഇവെകോ ടാറ്റാ ഗ്രൂപ്പിന് കീഴിലെ ഒരു കമ്പനിയായാണ് പ്രവര്ത്തിക്കുക. ഇവെകോയ്ക്ക് ഇപ്പോള് യൂറോപ്യന് രാജ്യങ്ങളിലുള്ള സാന്നിധ്യം, വാഹന ശ്രേണി, വ്യാവസായികോല്പാദന ശേഷി എന്നിവ ടാറ്റ ഉപയോഗപ്പെടുത്തും.
