മുംബൈ ; വിവാഹത്തട്ടിപ്പ് വീര സമീറ ഫാത്തിമ ഒടുവിൽ കുടുങ്ങി . 35 കാരിയായ സമീറ ഒൻപതാമത്തെ നിക്കാഹിനുള്ള ഒരുക്കങ്ങൾക്കിടെയാണ് പൊലീസ് പിടിയിലായത് .മഹാരാഷ്ട്ര നാഗ്പൂർ സ്വദേശിയാണ്.
8 തവണ നിക്കാഹ് കഴിച്ച സമീറ ഈ ഭർത്താക്കന്മാരിൽ നിന്ന് പണം തട്ടിയെടുത്ത് മുങ്ങുകയായിരുന്നു പതിവ്. എട്ട് പുരുഷന്മാരിൽ നിന്നായി സമീറ ലക്ഷക്കണക്കിന് രൂപ തട്ടിയെടുത്തുവെന്ന് പൊലീസ് പറഞ്ഞു. ഒമ്പതാം തവണയും വിവാഹം കഴിക്കാൻ ശ്രമിക്കുന്നതിനിടെയാണ് അവർ പിടിയിലായത്. ഫാത്തിമ ഒരു സ്കൂൾ അധ്യാപികയാണ്, അവർക്ക് 12 വയസ്സുള്ള ഒരു കുട്ടിയുമുണ്ട്.
മാട്രിമോണി സൈറ്റുകളിലും, സോഷ്യൽ മീഡിയയിലും വിവാഹ പരസ്യം നൽകുന്ന മുസ്ലീം സമുദായത്തിലെ പുരുഷന്മാരെ ലക്ഷ്യം വച്ചായിരുന്നു തട്ടിപ്പ് . താൻ വിധവയാണെന്നും, രണ്ടാം വിവാഹത്തിന് താല്പര്യമുണ്ടെന്നും പറഞ്ഞാണ് സമീറ ഇവരെ വിളിക്കുക.
വിവാഹം രജിസ്റ്റർ ചെയ്ത് കഴിഞ്ഞാൽ ഭർത്താവിനെ പല രീതിയിലും ഉപദ്രവിക്കും. ഭർത്താവുമായുള്ള സംഭാഷണങ്ങൾ റെക്കോർഡുചെയ്യുമായിരുന്നു. പിന്നീട്, അത് ഇഷ്ടാനുസരണം എഡിറ്റ് ചെയ്യുകയും അത് വച്ച് ബ്ലാക്ക് മെയിൽ ചെയ്യുകയും ചെയ്തു. വ്യഭിചാരം, പീഡനം എന്നീ കുറ്റങ്ങൾ ചുമത്തി വിവാഹം കഴിച്ച പുരുഷന്മാർക്കെതിരെ കേസുകൾ ഫയൽ ചെയ്യുമായിരുന്നു. ഒടുവിൽ, കേസ് പിൻവലിക്കാൻ ഭർത്താവിൽ നിന്ന് തന്നെ പണം തട്ടിയെടുക്കുമായിരുന്നു.
2024-ൽ ഗുലാം പത്താൻ എന്നയാൾ അവർക്കെതിരെ കേസ് ഫയൽ ചെയ്തിരുന്നു. 2022-ൽ ഫാത്തിമയെ വിവാഹം കഴിച്ച ഗുലാം, ഫാത്തിമ തനിക്കെതിരെ വ്യാജ കേസുകൾ ചുമത്തി തന്റെ പക്കൽ നിന്ന് 10 ലക്ഷം രൂപയുടെ ചെക്ക് വാങ്ങിയതായി പരാതിയിൽ ആരോപിച്ചിരുന്നു. അദ്ദേഹത്തിന്റെ പരാതിയുടെ അടിസ്ഥാനത്തിൽ, നാഗ്പൂരിലെ സിവിൽ ലൈനിലെ ഡാലി കി തപ്രിയിൽ വെച്ച് പോലീസ് ഫാത്തിമയെ പിന്തുടരുകയും അറസ്റ്റ് ചെയ്യുകയുമായിരുന്നു.
