ന്യൂദല്ഹി:’കേദാര്നാഥിലെ കാക്കകള്’ എന്ന യാത്രപുസ്തകത്തിന്റെ തലക്കെട്ട് തന്നെ കൗതുകമുണര്ത്തുന്നതാണ്. ധ്യാന് തര്പന് എഴുതിയ ഈ പുസ്തകം ഹിമാലയത്തിലെ ആത്മീയാന്വേഷണങ്ങളെക്കുറിച്ചാണ്. ജീവിതത്തിന്റെ വിവിധ വീക്ഷണങ്ങളെക്കുറിച്ചുള്ള ചിന്തകള്, ആത്മീയത, മനുഷ്യാനുഭവങ്ങള് എന്നിവയെക്കുറിച്ചാണ് ഈ പുസ്തകം വിവരിക്കുന്നത്.
ദാര്ശനികവും കാവ്യാത്മകവുമായി ജീവിതത്തെ വിലയിരുത്തുന്നുണ്ട് ഈ പുസ്തകം. ഹിമാലയത്തിലേക്ക് ഒരു വിനോദ സഞ്ചാരിയായി പോകുന്ന വ്യക്തി ക്രമേണ ഒരു തീര്ത്ഥാടകനായി മാറുന്നത് കാണാം. ഹിമാലയ യാത്ര ഇയാള്ക്ക് വിശുദ്ധമായ അകംപൊരുള് തേടലായി മാറുകയാണ്.
ശിവപുരി ബാബയുടെ പാഠങ്ങള്, ബാവുല് മിസ്റ്റിക്കുമായുള്ള കൂടിക്കാഴ്ച എല്ലാം ഈ പുസ്തകത്തില് വായിക്കാനാവും. ഹൈകു കവിതകള്, ചരിത്രപരമായ ചിന്തകള് എന്നിവയും ഇതില് ഉണ്ട്. പുസ്തകത്തിലുടനീളം അര്ത്ഥവത്തായ ആത്മഭാഷണങ്ങളിലൂടെ ഓഷോയും സ്വാമി രാമയും ജെ.കൃഷ്ണമൂര്ത്തിയും ശിവപുരി ബാബയും വിവിധ സെന് ഗുരുക്കന്മാരുടെയും ദര്ശനങ്ങളും വാക്യങ്ങളും കടന്നുവരുന്നു. കേദാര്നാഥില് കാണപ്പെടുന്ന ദുരൂഹമായ കാക്കകള് ഒരു സെന് ബോധോദയത്തിനുള്ള പശ്ചാത്തലമൊരുക്കുന്നതായി പുസ്തകരചയിതാവ് കണ്ടെത്തുന്നു.
ആമസോണില് ഈ പുസ്തകം വില്പനയ്ക്കുണ്ട്. ഈ പുസ്തകം ഇംഗ്ലീഷിലേക്ക് തര്ജ്ജമ ചെയ്തിരിക്കുന്നത് മലയാളിയായ ശ്രീജ രാമനാണ്.
