മുംബൈ: റെയ്ഡിന് പിന്നാലെ വ്യവസായി അനില് അംബാനിയെ ചോദ്യം ചെയ്യാന് വിളിപ്പിച്ച് ഇഡി. ഇതോടെ അനില് അംബാനിയുടെ റിലയന്സ് ഇന്ഫ്രാസ്ട്രക്ചര്, റിലയന്സ് പവര് എന്നീ ഓഹരിവിലകളില് അഞ്ച് ശതമാനം ഇടിവ് രേഖപ്പെടുത്തി.
റിലയന്സ് ഇന്ഫ്രായുടെ ഓഹരി വില അഞ്ച് ശതമാനം ഇടിഞ്ഞു. 52 രൂപ 70 പൈസയില് നിന്നും 50 രൂപയിലേക്ക് താഴ്ന്നു. റിലയന്സ് പവറിന്റെ ഓഹരി വിലയും അഞ്ച് ശതമാനത്തോളം ഇടിഞ്ഞു. ഇവയുടെ വില 328 രൂപയില് നിന്നും 311 രൂപ 70 പൈസയിലേക്ക് താഴ്ന്നു.
17,000 കോടി രൂപയുടെ വായ്പാ തട്ടിപ്പുമായി ബന്ധപ്പെട്ട് കഴിഞ്ഞ ആഴ്ച ഇഡി അനില് അംബാനിയുടെ മുംബൈയിലെ വിവിധ ഓഫീസുകളില് റെയ്ഡ് നടത്തിയിരുന്നു. ആഗസ്ത് അഞ്ചിന് ഇഡിയുടെ ദല്ഹി ഓഫീസില് ആണ് ചോദ്യം ചെയ്യാന് വിളിപ്പിച്ചിരിക്കുന്നത്. കള്ളപ്പണം വെളുപ്പിക്കലുമായി ബന്ധപ്പെട്ടാണ് റെയ്ഡ് നടത്തിയത്. ഒപ്പം അനില് അംബാനിയുടെ 50 കമ്പനികളുടെയും 25 വ്യക്തികളുടെയും സാമ്പത്തിക ഇടപാടുകളും കൂടി റെയ്ഡില് ഇഡി പരിശോധിച്ചിരുന്നു. ഇതിന് പിന്നാലെയാണ് കൂടുതല് ചോദ്യം ചെയ്യലിനായി അനില് അംബാനിയെ ചോദ്യം ചെയ്യലിന് വിളിപ്പിച്ചിരിക്കുന്നത്.
വിവിധ ധനകാര്യ സ്ഥാപനങ്ങള് നടത്തിയ അന്വേഷണത്തിലെ കണ്ടെത്തലുകള് ഈയിടെ ഓഹരി വിപണിയെ നിയന്ത്രിക്കുന്ന സെബി (സെക്യൂരിറ്റി ആന്റ് എക്സ് ചേഞ്ച് ബോര്ഡ് ഓഫ് ഇന്ത്യ) പങ്കുവെച്ചിരുന്നു. ഇതിന്റെ അടിസ്ഥാനത്തിലായിരുന്നു ഇഡിയുടെ റെയ്ഡ്. റിലയന്സ് ഇന്ഫ്രാസ്ട്രക്ചര് സിഎല്ഇ പ്രൈവറ്റ് ലിമിറ്റഡ് എന്ന സ്ഥാപനം വഴി 10,000 കോടി രൂപ വഴിതിരിച്ചുവിട്ടിരുന്നു. അനില് അംബാനിയുടെ റിലയന്സ് ഗ്രൂപ്പിന്റെ ഉദ്യോഗസ്ഥര് എന്ന നിലയ്ക്കാണ് സിഎല്ഇ പ്രൈവറ്റ് ലിമിറ്റഡിലെ ഉദ്യോഗസ്ഥര് വ്യാജ ഇമെയില് വഴി മെയില് അയച്ചിരുന്നത്. കോര്പറേറ്റ് കമ്പനികള്ക്കിടയിലെ നിക്ഷേപക്കൈമാറ്റം എന്ന മറവിലായിരുന്ന ഈ അനധികൃത സാമ്പത്തിക ഇടപാടുകള് നടന്നത്.
“പത്ത് വര്ഷംമുന്പുള്ള ഒരു കേസിനെക്കുറിച്ചാണ് ഇപ്പോള് ഇഡി പറയുന്നത്. വെളിപ്പെടുത്താത്ത ഒരു പാര്ട്ടിക്ക് റിലയന്സ് ഇന്ഫ്ര 10,000 കോടി രൂപ കൈമാറി എന്നാണ് ഈ കേസ്. പക്ഷെ യഥാര്ത്ഥത്തില് റിലയന്സ് ഇന്ഫ്ര കൈമാറിയിരിക്കുന്നത് 6500 കോടി രൂപ മാത്രമാണ്.”- അനില് അംബാനിയുടെ റിലയന്സ് ഇന്ഫ്ര നല്കുന്ന ഔദ്യോഗിക വിശദീകരണമാണിത്. ഇക്കാര്യത്തെക്കുറിച്ച് ആറ് മാസം മുന്പ് , അതായത് 2025 ഫെബ്രുവരി 9ന് തന്നെ വെളിപ്പെടുത്തിയിരുന്നുവെന്നും റിലയന്സ് ഇന്ഫ്ര ഉദ്യോഗസ്ഥര് അവകാശപ്പെടുന്നു. 2022 മുതലുള്ള മൂന്ന് വര്ഷമായി അനില് അംബാനി റിലയന്സ് ഇന്ഫ്രയുടെ ഡയറക്ടര് ബോര്ഡില് അംഗമല്ലെന്നും അതിനാല് ഇഡി ഇക്കാര്യത്തില് ചോദ്യം ചെയ്യാന് വിളിപ്പിക്കുന്നതില് അര്ത്ഥമില്ലെന്നും റിലയന്സ് ഇന്ഫ്ര പ്രതികരിക്കുന്നു.
