ന്യൂദല്ഹി: കേരളത്തിലെ ദേശീയപാത വികസനവുമായി ബന്ധപ്പെട്ട വിവിധ പദ്ധതികളുടെ സുഗമമായ നടത്തിപ്പിനും ഏകോപനത്തിനുമായി പ്രത്യേക നോഡല് ഓഫീസറെ നിയമിക്കുമെന്ന് കേന്ദ്ര റോഡ് ഗതാഗത വകുപ്പ് മന്ത്രി നിതിന് ഗഡ്കരി ബിജെപി സംസ്ഥാന അദ്ധ്യക്ഷന് രാജീവ് ചന്ദ്രശേഖറെ അറിയിച്ചു.
ദേശീയപാത വികസനം അടക്കം സംസ്ഥാനത്തെ ഗതാഗത മേഖലയുമായി ബന്ധപ്പെട്ട വിവിധ വിഷയങ്ങള് ചര്ച്ചചെയ്യുന്നതിനായി രാജീവ് ചന്ദ്രശേഖര്, ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസ് എന്നിവര് നിതിന് ഗഡ്കരിയെ സന്ദര്ശിച്ചിരുന്നു.
ഈ കൂടിക്കാഴ്ചയിലാണ് അടിയന്തര നടപടിയായി പ്രത്യേക നോഡല് ഓഫീസറെ നിയമിക്കുമെന്ന് നിതിന് ഗഡ്കരി അറിയിച്ചത്. കേരളത്തിന്റെ ആവശ്യങ്ങള് പരിഗണിച്ച് അടിയന്തര നടപടിയെടുത്ത നിതിന് ഗഡ്കരിക്ക് രാജീവ് ചന്ദ്രശേഖര് നന്ദി അറിയിച്ചു.
