കെന്നിങ്ടണ് ഓവല്: ഇംഗ്ലണ്ടിനെത്തിയ ശേഷം നായകനെന്ന നിലയില് തോല്വികളാണ് ഫലമെങ്കിലും ബാറ്റര് എന്ന നിലയില് ശുഭ്മന് ഗില്ലിന് ശുഭദശയാണ് ഇംഗ്ലണ്ടില്. നായകനായുള്ള ആദ്യ ടെസ്റ്റ് പരമ്പരയില് തന്നെ മിന്നും പ്രകടനമാണ് ശുഭ്മന് ഗില് ഇംഗ്ലണ്ടില് കാഴ്ചവയ്ക്കുന്നത്. നിരവധി റെക്കോര്ഡുകളാണ് ഗില് ഇതിനോടകം സ്വന്തമാക്കിയിരിക്കുന്നത്. അഞ്ചാം ടെസ്റ്റില് ബാറ്റിങ്ങിനിറങ്ങിയ ഉടനെ തന്നെ സാക്ഷാല് സുനില് ഗാവസ്കറുടെ റെക്കോര്ഡ് ഗില് മറികടന്നു. ഒരു ടെസ്റ്റ് പരമ്പരയില് ഏറ്റവും കൂടുതല് റണ്സ് നേടുന്ന ഭരതനായകനെന്ന റെക്കോഡാണ് ഗില് സ്വന്തമാക്കിയത്.
1978-79 ല് വിന്ഡീസിനെതിരായ ടെസ്റ്റ് പരമ്പരയില് ഗാവസ്കര് നേടിയ 732 റണ്സ് എന്ന റെക്കോഡാണ് അഞ്ചാം മത്സരത്തിനിടെ ഗില് മറികടന്നത്. സ്വന്തം സ്കോര് 11ലെത്തിയപ്പോഴാണ് ഗില് ചരിത്രനേട്ടം സ്വന്തമാക്കിയത്. ഈ പരമ്പരയിലെ രണ്ട് ഇന്നിങ്സുകളിലുമായി 79 റണ്സ് കൂടി നേടിയാല് ക്യാപ്റ്റനായുള്ള ആദ്യ പരമ്പരയില് ഏറ്റവും കൂടുതല് റണ്സ് നേടുന്ന താരമെന്ന റെക്കോഡിലെത്തും. സാക്ഷാല് ഡോണ് ബ്രാഡ്മാനാണ് ഇപ്പോള് ഒന്നാം സ്ഥാനത്ത്. 1936ല് ഇംഗ്ലണ്ടിനെതിരായ നാട്ടിലെ പരമ്പരയില് 810 റണ്സാണ് നേടിയ ബ്രാഡ്മാന് നേടിയത്. വെസ്റ്റിന്ഡീസിനെതിരെ ഹോം സീരീസില് 702 റണ്സ് നേടിയ ഗ്രേഗ് ചാപ്പല് മൂന്നാമതും 1974ല് ഭരതത്തിനെതിരേ ഭാരതത്തില്വച്ച് 636 റണ്സ് നേടിയ ക്ലൈവ് ലോയ്ഡാണ് നാലാമത്. ഒരു പരമ്പരയില് കൂടുതല് റണ്സ് നേടിയ ഭാരത താരമെന്ന റെക്കോര്ഡ് മറികടക്കാനും ഒരു ഇന്നിങ്സ് കൂടി ശേഷിക്കേ, ഗില്ലിനാകും. അതിലേക്ക് 22 റണ്സ് കൂടിയാണ് ഗില്ലിനു വേണ്ടത്. 1971-ല് വിന്ഡീസിനെതിരേ 774 റണ്സ് ഗാവസ്കര് നേടിയിട്ടുണ്ട്.
ഒരു പരമ്പരയില് ഏറ്റവും കൂടുതല് റണ്സ് നേടിയ താരമെന്ന ഖ്യാതി ബ്രാഡ്മാന്റെ പേരില്ത്തന്നെയാണ്, 974 റണ്സ്! ഓവല് ടെസ്റ്റില് ഒരു സെഞ്ച്വറി കൂടി നേടിയാല് ഒരു പരമ്പരയില് കൂടുതല് ശതകം തികയ്ക്കുന്ന നായകനെന്ന റെക്കോര്ഡിനൊപ്പവും ഗില് എത്തും. വെസ്റ്റ് ഇന്ഡീസിന്റെ ക്ലൈഡ് വാല്ക്കോട്ട് 1955-ല് ഓസ്ട്രേലിയക്കെതിരായ പരമ്പരയില് നേടിയ അഞ്ചു സെഞ്ച്വറികളുടെ റെക്കോര്ഡിനൊപ്പമാണ് ഗില് എത്തുക. ഗില്, സുനില് ഗാവസ്ക്കര്, ഡോണ് ബ്രാഡ്മാന് എന്നിവര് ഒരു പരമ്പരയില് നാല് സെഞ്ച്വറികള് വീതം നേടിയിട്ടുണ്ട്.
