കോഴിക്കോട് : സാമൂതിരി രാജവംശത്തിലെ മാനവിക്രമന്റെ പേര് പരാമര്ശിക്കുന്ന ശിലാലിഖിതം കോഴിക്കോട് ജില്ലയിലെ പേരാമ്പ്രയ്ക്കടുത്ത് ആവള – കുട്ടോത്ത് നരസിംഹമൂര്ത്തി ക്ഷേത്രത്തിന്റെ ബലിക്കല്ലില് സംസ്ഥാന പുരാവസ്തു വകുപ്പ് കണ്ടെത്തി. കാലം സൂചിപ്പിക്കാത്ത ഈ വട്ടെഴുത്ത് ലിഖിതം ലിപി ശൈലിയുടെ അടിസ്ഥാനത്തില് 12-13 നൂറ്റാണ്ടിലേതാണെന്ന് കണക്കാക്കുന്നു. ആവള എന്ന് ഇന്നറിയപ്പെടുന്ന സ്ഥലത്തിന്റെ അക്കാലത്തെ പേര് അകവള എന്നായിരുന്നു എന്ന് ലിഖിതത്തില് നിന്ന് അറിയാം. അകവളയിലെ അധികാരരായിരുന്ന കേളിത്തനും അദ്ദേഹത്തിന്റെ ഇളയ സഹോദരനും ചേര്ന്ന് ക്ഷേത്രം നിര്മ്മിച്ചതാണ് രേഖാ പരാമര്ശം. സഹോദരന് മാനവിക്രമ രാജാവിന്റെ കീഴ്പടൈ നായരായിരുന്നു എന്നും രേഖയില് പറയുന്നു. സാമൂതിരിയുടെ ഉപസേനാധിപനായിരുന്നു അദ്ദേഹമെന്ന് കരുതാം. ഇതു കൂടാതെ മറ്റൊരു ലിഖിതവും ക്ഷേത്രത്തിലുണ്ട്. ക്ഷേത്രം നിര്മ്മിച്ചവര് അമ്പലത്തില് നടത്തിയ ചില ഏര്പ്പാടുകളാണ് ഈ ലിഖിതത്തിലുള്ളത്. ഒരു ശിലാപാളിയുടെ ഇരുവശങ്ങളിലുമായി വട്ടെഴുത്ത് ലിപിയില്ത്തന്നെയാണ് ഈ രേഖയുമുള്ളത്.
പുരാവസ്തു വകുപ്പിലെ കോഴിക്കോട് പഴശ്ശിരാജാ മ്യൂസിയം ഓഫീസര് കെ. കൃഷ്ണരാജാണ് ലിഖിതം പകര്ത്തിയത്. ‘മധ്യകാലഘട്ടത്തിന്റെ ആരംഭ നൂറ്റാണ്ടുകളില് സാമൂതിരിമാരെ സംബന്ധിക്കുന്നലിഖിതങ്ങള് വളരെ അപൂര്വമാണ്.പ്രശസ്ത ലിപി പണ്ഡിതനായ ഡോ. എം.ആര്. രാഘവവാരിയര് ക്ഷേത്രം സന്ദര്ശിച്ച് ലിഖിതങ്ങള് പരിശോധിച്ചു.
