കളമശേരി: വന് തുക ഈടാക്കി നിയമവിരുദ്ധമായി കൃത്രിമ ഗര്ഭധാരണത്തിനായി പെണ്കുട്ടികളുടെ അണ്ഡം ശേഖരിച്ചു നല്കിയതായി പരാതി ഉയര്ന്നതിന്റെ അടിസ്ഥാനത്തില് ഇടപ്പള്ളി ടോളില് പ്രവര്ത്തിക്കുന്ന സ്വകാര്യ സ്ഥാപനത്തിന്റെ ഓഫീസും ഹോസ്റ്റലും പ്രത്യേക സംഘം പരിശോധിച്ചു.
ഹോസ്റ്റലില് താമസിപ്പിച്ചു വരികയായിരുന്ന അഞ്ച് ഇതരസംസ്ഥാനക്കാരായ പെണ്കുട്ടികളെ കണ്ടെത്തി. എളമക്കര പോലീസില് ഇത് സംബന്ധിച്ച് അന്വേഷണ സംഘം റിപ്പോര്ട്ട് നല്കി. കൂനംതൈ എകെജി റോഡില് പ്രവര്ത്തിക്കുന്ന സ്ഥാപനവും എന്എച്ച് എകെജി ലൈനിലെ ഹോസ്റ്റലുമാണ് പരിശോധിച്ചത്. പാലാരിവട്ടത്ത് പ്രവര്ത്തിക്കാന് നിയമാനുസൃത രേഖകളുള്ള സ്ഥാപനം രേഖകളില്ലാതെയാണ് എകെജി റോഡില് പ്രവര്ത്തിക്കുന്നത്.
അസിസ്റ്റഡ് റീപ്രൊഡക്ടീവ് ടെക്നോളജി (എആര്ടി), വാടക ഗര്ഭധാരണം സംബന്ധിച്ച 2021 ലെ ആക്ട് അനുസരിച്ച് സംസ്ഥാനത്ത് രൂപീകരിച്ച അപ്രോപ്രിയേറ്റ് അതോറിറ്റി ചെയര്മാന്റെ നേതൃത്വത്തിലായിരുന്നു പരിശോധന നടത്തിയത്. നിയമവിരുദ്ധമായി അണ്ഡം എടുക്കാനായി പാര്പ്പിച്ച പെണ്കുട്ടികളെയും അണ്ഡം സൂക്ഷിച്ചുവെക്കാനുള്ള സംവിധാനങ്ങളുമാണ് ഇവിടെ കണ്ടെത്തിയത്.
ഇത് സംബന്ധിച്ച് കളമശേരി കോടതിയില് റിപ്പോര്ട്ട് നല്കുമെന്ന് ചെയര്മാന് പറഞ്ഞു. എറണാകുളം ഡിഎംഒ ഉള്പ്പെടെ 12 അംഗ സംഘമാണ് പരിശോധന നടത്തിയത്. എളമക്കര, കളമശേരി സ്റ്റേഷനുകളിലെ പോലീസ് റെയ്ഡില് പങ്കെടുത്തു.
