തിരുവനന്തപുരം: പ്രധാനമന്ത്രി നരേന്ദ്രമോദിയുടെ നേതൃത്വത്തില് 11 വര്ഷത്തിനിടെ രാജ്യത്ത് മുന്പ് ഉണ്ടായിട്ടില്ലാത്ത സമാധാനവും പുരോഗതിയും ജനക്ഷേമവും വളര്ന്നെന്ന് കേന്ദ്ര ആഭ്യന്തരമന്ത്രി അമിത് ഷാ പറഞ്ഞു. കേരള സന്ദര്ശനത്തിനിടെ ‘ജന്മഭൂമി’ക്ക് മാത്രമായി അനുവദിച്ച അഭിമുഖത്തില് സംസാരിക്കുകയായിരുന്നു അദ്ദേഹം.
ഭീകരപ്രവര്ത്തനം ഒരുതരത്തിലും വച്ചുപൊറുപ്പിക്കില്ലെന്നും നിരോധിക്കപ്പെട്ട ഭീകര സംഘടനയായ പോപ്പുലര് ഫ്രണ്ടിനുവേണ്ടി പ്രവര്ത്തിക്കുന്നവരേയും അവരെ ഏതുതരത്തിലും സഹായിക്കുന്നവരേയും ഉരുക്കുമുഷ്ടി ഉപയോഗിച്ചുതന്നെ നേരിടുമെന്നും അദ്ദേഹം പറഞ്ഞു. കേരളഭരണം ബിജെപിക്ക് ഒരുപടിമാത്രം അകലെയാണെന്ന് കണക്കുകള് നിരത്തി അമിത് ഷാ വിശദീകരിച്ചു.
2026ല് ബിജെപി സംസ്ഥാനത്തെ മുഖ്യരാഷ്ട്രീയ ശക്തിയാകും. സംസ്ഥാനത്ത് ബിജെപിയെ വിലയിരുത്തുന്ന രാഷ്ട്രീയ നിരീക്ഷകര് കുറച്ചുകൂടി സൂക്ഷ്മമായി കാര്യങ്ങള് പഠിക്കേണ്ടതുണ്ടെന്ന് അമിത് ഷാ പറഞ്ഞു. പോയകാല തെരഞ്ഞെടുപ്പുകളില് ബിജെപിയുടെ വോട്ട് വിഹിതം സംസ്ഥാനത്തു ക്രമത്തില് കൂടിവരുന്നുണ്ട്. മോദി ഭരണകാലത്ത് മുമ്പില്ലാത്ത സമാധാനം രാജ്യത്ത് നിലനില്ക്കുന്നു. 11 വര്ഷത്തിനിടെ പാവപ്പെട്ടവരുടെ ക്ഷേമത്തിനും ദാരിദ്ര്യ നിര്മ്മാര്ജ്ജനത്തിനും ഒട്ടേറെ പദ്ധതികള് നടപ്പാക്കി. അതിന്റെയൊക്കെ ഫലം കേരളത്തിലും പ്രതിഫലിക്കും.
രാജ്യത്ത് വന് ദുരന്തമായി മാറിക്കഴിഞ്ഞ ലഹരിമരുന്ന് മാഫിയയെ ഒതുക്കാന് സര്ക്കാരിന്റെ വിശാലമായ സംവിധാനം സജ്ജമാകുകയാണെന്ന് പറഞ്ഞ ആഭ്യന്തര മന്ത്രി, 2026 മാര്ച്ച് 31 ന് ഭാരതത്തെ നക്സല് പ്രവര്ത്തനവിമുക്തമാക്കുമെന്നും പദ്ധതി വിശദീകരിച്ചു വ്യക്തമാക്കി.
കേരള സര്ക്കാരും മുന്നണികളും മോദി സര്ക്കാരിനെതിരേ പ്രചരിപ്പിക്കുന്ന രാഷ്ട്രീയ വിവേചനമെന്ന ആക്ഷേപം അടിസ്ഥാന രഹിതമാണെന്ന് അമിത് ഷാ സ്ഥാപിച്ചു. കേന്ദ്ര സഹായം സംബന്ധിച്ച്, കഴിഞ്ഞ 20 വര്ഷത്തെ കണക്കുകള് പുറത്തുവിടാന് മുഖ്യമന്ത്രി പിണറായി വിജയന് എന്തുകൊണ്ട് തയാറാകുന്നില്ല? മോദിഭരണത്തില് കേന്ദ്രസഹായം, അതിനുമുന്പത്തെ പത്തുവര്ഷത്തിനിടെ ലഭിച്ചിരുന്നതിനേക്കാള് ആറിരട്ടിയായി. 72,000 കോടി രൂപ കിട്ടിയിരുന്നത് 3.31 ലക്ഷം കോടിയായി. നികുതിയിനത്തില് 2004 മുതല് പത്തുവര്ഷത്തില് ലഭിച്ചിരുന്നതിന്റെ മൂന്നിരട്ടിയാണിപ്പോള് കിട്ടുന്നത്. അതായത് 1.57 ലക്ഷം കോടിരൂപ. മുഖ്യമന്ത്രി പിണറായി വിജയന് സ്വന്തം ഭരണ വീഴ്ചകള് മറയ്ക്കാന് നുണകള് നെയ്ത് പ്രചരിപ്പിക്കുകയാണ്.
എല്ഡിഎഫ്, യുഡിഎഫ് മുന്നണികള് ഇത്രകാലവും ഭരിച്ച് തങ്ങളെ കബളിപ്പിക്കുകയായിരുന്നുവെന്ന് കേരളത്തിലെ ജനങ്ങള്ക്ക് മനസ്സിലായിക്കഴിഞ്ഞു. രണ്ടുമുന്നണികളുടെ ഭരണവും അഴിമതിയില് മുങ്ങിയതാണെന്ന് അവര് തിരിച്ചറിഞ്ഞു. സ്വര്ണ്ണക്കടത്ത്, സംസ്ഥാന സര്ക്കാര് സഹായത്തോടെ നടന്ന ഏറ്റവും വലിയ അഴിമതിയാണ്. ജനങ്ങളുടെ സ്വാഭാവികമായ പ്രതീക്ഷ ബിജെപിയിലും എന്ഡിഎയിലുമായിക്കഴിഞ്ഞു. തദ്ദേശസ്വയംഭരണ തെരഞ്ഞെടുപ്പുഫലം അത് തെളിയിക്കും. അടുത്തപടി നിയമസഭാ തെരഞ്ഞെടുപ്പാണ്, ചരിത്രത്തിലെ ഏറ്റവും കുറഞ്ഞ സീറ്റായിരിക്കും എല്ഡിഎഫിന് കിട്ടാന് പോകുന്നത്, അമിത് ഷാ പറഞ്ഞു.
പിണറായി വിജയന് സര്ക്കാരിന്റെയും യുഡിഎഫ് ഭരണകാലത്തെയും അഴിമതികള് എണ്ണിയെണ്ണിപ്പറഞ്ഞ ആഭ്യന്തരമന്ത്രി, കമ്യൂണിസ്റ്റുകള് പാര്ട്ടി പ്രവര്ത്തകരുടെ ക്ഷേമം മാത്രം നോക്കുമ്പോള് കേരള വികസനത്തെക്കുറിച്ച് ആലോചിക്കാന് പോലും സമയമില്ലാതായി എന്ന് അഭിപ്രായപ്പെട്ടു. വികസിത കേരളം എന്ന ബിജെപി മുദ്രാവാക്യം കേരളം ഏറ്റെടുക്കുമെന്നും സ്വതന്ത്ര ഭാരതത്തിന്റെ നൂറാം വര്ഷത്തില് ബിജെപിയുടെ നേതൃത്വത്തില് അതു യാഥാര്ഥ്യമാകുമെന്നും അമിത് ഷാ പറഞ്ഞു.
സഹകരണ പ്രസ്ഥാനം ഭാരതത്തിന്റെ ഭാവിയാണ്. അത് കുറ്റമറ്റതാക്കാന് മോദി സര്ക്കാര് അവതരിപ്പിച്ച പുതിയ സഹകരണ നിയമത്തെക്കുറിച്ചും അത് കേരളത്തിന് ഉള്പ്പെടെ ഉണ്ടാക്കാന് പോകുന്ന നേട്ടങ്ങളെക്കുറിച്ചും സഹകരണ വകുപ്പ് മന്ത്രികൂടിയായ അമിത് ഷാ വിശദീകരിച്ചു.
രാജ്യത്തിന്റെ സാമ്പത്തിക വളര്ച്ച, 11 വര്ഷത്തെ മോദി സര്ക്കാരിന്റെ നേട്ടങ്ങള്, അതില് കേരളത്തിന്റെ പങ്ക്, ഓപ്പറേഷന് സിന്ദൂറിന് ശേഷം ഭാരതത്തെക്കുറിച്ച് ലോകരാജ്യങ്ങള്ക്കുണ്ടായ കാഴ്ചപ്പാട്മാറ്റം, കശ്മീരിലെ യഥാര്ത്ഥ സ്ഥിതിഗതികള്, പുതിയ ക്രിമിനല് നിയമങ്ങള്, സൈബര് കുറ്റകൃത്യങ്ങള് തടയാനുള്ള സര്ക്കാര് പദ്ധതികള് തുടങ്ങി വിവിധ വിഷയങ്ങളില് കേന്ദ്ര ആഭ്യന്തര മന്ത്രി നടത്തിയ വെളിപ്പെടുത്തലുകള് വരും ദിവസങ്ങളില് കേരളം ചര്ച്ച ചെയ്യാന് പോകുന്ന വിഷയങ്ങളാണ്.
