പാലക്കാട്: വടക്കഞ്ചേരിയില് നേഖ എന്ന യുവതിയെ ഭര്തൃ വീട്ടില് മരിച്ച നിലയില് കണ്ടെത്തിയ സംഭവത്തില് ഭര്തൃമാതാവിനെ അറസ്റ്റ് ചെയ്തു. ഭര്തൃമാതാവ് തോണിപ്പാടം കല്ലിങ്ങല് വീട് ഇന്ദിര (52) ആണ് അറസ്റ്റിലായത്.
ആലത്തൂര് പൊലീസാണ് ഇന്ദിരയെ കസ്റ്റഡിയിലെടുത്തത്. ഭര്ത്താവ് പ്രദീപ് നേരത്തെ റിമാന്ഡിലായിരുന്നു. ബുധനാഴ്ച രാത്രിയാണ് കണ്ണമ്പ്ര കാരപ്പൊറ്റ കുന്നംപുള്ളി സ്വദേശി നേഖ (26)യെ ഭര്ത്താവ് പ്രദീപിന്റെ വീട്ടില് തൂങ്ങിയ കണ്ടെത്തിയത്.
ആത്മഹത്യ പ്രേരണ, സ്ത്രീധന പീഡനം എന്നിവ ചുമത്തിയാണ് കേസെടുത്തത്. യുവതിയെ ഉടന് തന്നെ ആശുപത്രിയിലെത്തിച്ചെങ്കിലും മരണം സ്ഥിരീകരിച്ചു. സംഭവ ദിവസം കോയമ്പത്തൂരില് നിന്നെത്തിയ പ്രദീപ് നേഖയുമായി വഴക്കിട്ടിരുന്നുവെന്ന് മൊഴി നല്കിയിട്ടുണ്ട്. നേഖയുടെ ഭര്ത്താവിനും കുടുംബത്തിനുമെതിരെ ആരോപണവുമായി യുവതിയുടെ കുടുംബം പരാതി നല്കുകയായിരുന്നു. പിന്നാലെ അന്വേഷണത്തിന് ശേഷമാണ് ഭര്ത്താവും ഇപ്പോള് ഭര്തൃമാതാവും അറസ്റ്റിലായത്.
