തദ്ദേശ തിരഞ്ഞെടുപ്പ് കരട് വോട്ടര്‍ പട്ടിക: ഇതിനകം ലഭിച്ചത് ഒന്നേകാല്‍ ലക്ഷത്തിലധികം അപേക്ഷകള്‍

തിരുവനന്തപുരം: തദ്ദേശ സ്ഥാപനങ്ങളിലെ കരട് വോട്ടര്‍പട്ടിക സംബന്ധിച്ച് ഒന്നേകാല്‍ ലക്ഷത്തിലധികം അപേക്ഷകള്‍ ലഭിച്ചു. അപേക്ഷകളില്‍ 105948 എണ്ണം പേര് ചേര്‍ക്കുന്നതിനും, മറ്റുളളവ ഭേദഗതി, സ്ഥാനമാറ്റം, ഒഴിവാക്കല്‍ എന്നിവയ്‌ക്കുമാണ്. പേര് ചേര്‍ക്കുന്നതിനും പട്ടികയിലെ ഉള്‍ക്കുറിപ്പുകളില്‍ ഭേദഗതി വരുത്തുന്നതിനും ഒരു വാര്‍ഡില്‍ നിന്ന് മറ്റൊരു വാര്‍ഡിലേക്കോ പോളിംഗ് സ്റ്റേഷനിലേക്കോ സ്ഥാനമാറ്റം വരുത്തുന്നതിനും പേര് ഒഴിവാക്കുന്നതിനുമുളള അപേക്ഷകള്‍ ആഗസ്റ്റ് 7 വരെ നല്‍കാം കമ്മീഷന്റെ sec.kerala.gov.in വെബ്സൈറ്റിലാണ് ഓണ്‍ലൈന്‍ അപേക്ഷകള്‍ നല്‍കേണ്ടത്. പട്ടികയില്‍ നിന്ന് ഒഴിവാക്കുന്നതിന് ഓണ്‍ലൈനായി രജിസ്റ്റര്‍ ചെയ്ത് പ്രിന്റൗട്ട് ഒപ്പിട്ട് ERO യ്‌ക്ക് ലഭ്യമാക്കണം. ഫാറം 5 ലെ ആക്ഷേപം നേരിട്ടോ തപാലിലൂടെയോ നല്‍കുന്നതും സ്വീകരിക്കും.
ജൂലൈ 23 പ്രസിദ്ധീകരിച്ച കരട് പട്ടികയില്‍ ആകെ 2,66,78,256 വോട്ടര്‍മാര്‍ ഉണ്ടായിരുന്നു. 2020 ലെ പൊതുതിരഞ്ഞെടുപ്പില്‍ ഉപയോഗിച്ച വോട്ടര്‍പട്ടിക ഉപതിരഞ്ഞെടുപ്പുകള്‍ക്കായും 2023 ലും 2024 ലും സമ്മറി റിവിഷന്‍ നടത്തിയും പുതുക്കിയാണ് കരട് പട്ടിക തയ്യാറാക്കിയിരുന്നത്.