നര മറയ്ക്കാൻ ഉപയോഗിക്കുന്ന ഹെയർ ഡൈ ബ്ലാഡർ കാൻസർ വരാനുള്ള സാധ്യത കൂട്ടും എന്ന് ശാസ്ത്രീയപഠനങ്ങൾ . ഹെയർ ഡൈയിൽ അടങ്ങിയ ചില രാസവസ്തുക്കൾ കാൻസറിനു കാരണമാകും എന്ന് ഇന്റർനാഷണൽ ഏജൻസി ഫോർ റിസർച് ഓൺ കാൻസർ പറഞ്ഞിട്ടുണ്ട്.
ഹെയർ ഡൈയുടെ ഉപയോഗം ബ്ലാഡർ കാൻസറിനും സ്തനാർബുദത്തിനും ലുക്കീമിയ, ലിംഫോമ തുടങ്ങിയ രക്താർബുദങ്ങൾക്കും കാരണമാകും എന്ന് ശാസ്ത്രീയപഠനങ്ങൾ പറയുന്നു. ഇതിൽ തന്നെ ബ്ലാഡർ കാൻസർ വരാനുള്ള സാധ്യതയാണ് ഏറ്റവും കൂടുതൽ.
ഹെയർ ഡൈയിൽ അടങ്ങിയിരിക്കുന്ന ചില രാസവസ്തുക്കളാണ് അപകടകാരികൾ. ഈ രാസവസ്തുക്കൾ തലയോട്ടിയിലൂടെ ആഗിരണം ചെയ്യപ്പെടുകയും രക്തത്തിൽ കലരുകയും ചെയ്യും. വൃക്കകൾ ഇവയെ അരിച്ചു മാറ്റുകയും ക്രമേണ ഇത് മൂത്രസഞ്ചി (bladder) യിൽ അടിഞ്ഞുകൂടുകയും ചെയ്യും. മൂത്രസഞ്ചിയുടെ ആന്തരിക പാളിയിൽ രാസവസ്തുക്കൾ കലരുകയും ഇത് കാൻസർ ബാധിക്കാൻ ഇടയാക്കുകയും ചെയ്യും.
ഹെയർ ഡൈയിൽ അടങ്ങിയിട്ടുള്ള അമോണിയ തലമുടിയുടെ പിഎച്ച് കൂട്ടുകയും പുറംപാളി തുറന്ന് ഹെയർ ഡൈ ഉള്ളിലെത്താൻ കാരണമാകുകയും ചെയ്യുന്നു. ഹൈഡ്രജൻ പെറോക്സൈഡ്, ബ്ലീച്ചിങ്ങ് ഏജന്റും ഓക്സിഡൈസിങ്ങ് ഏജന്റും ആയി പ്രവർത്തിക്കുന്നു.
ഇത് നാച്വറൽ പിഗ്മെന്റിനെ വിഘടിപ്പിക്കും. പെർമനന്റ് ഹെയർഡൈകളിൽ ഉപയോഗിക്കുന്ന അരോമാറ്റിക് അമീൻ ആയ പാരാഫിനൈൽ എനൈഡിയാമിൻ (PPD) തലമുടിയിൽ രാസപ്രവർത്തനങ്ങൾ നടത്തി ഏറെക്കാലം നീണ്ടു നിൽക്കുന്ന നിറം നൽകുന്നു. ഹെയർ ഡൈകളിലെ ഈ ചേരുവകളെല്ലാം ഫലപ്രദമാണെങ്കിലും അവ പാർശ്വഫലങ്ങൾ ഉണ്ടാക്കും. അമോണിയ തലയോട്ടിയിൽ അസ്വസ്ഥത ഉണ്ടാക്കും.
വീടുകളിൽ തന്നെ ഇടയ്ക്ക് ഹെയർ ഡൈ ഉപയോഗിക്കുന്ന വ്യക്തികൾക്ക് കാൻസർ വരാനുള്ള സാധ്യത കുറവാണ്. എന്നാൽ വർഷങ്ങളായി പതിവായി ഹെയർ ഡൈയുമായി സമ്പർക്കത്തിലേർപ്പെടുന്ന പ്രഫഷണലുകൾക്ക് ബ്ലാഡർ കാൻസർ വരാനുള്ള സാധ്യത കൂടുതലാണ്.
