ന്യൂയോര്ക്ക്: ഈ ഓഗസ്റ്റ് 2 ന് പൂര്ണ്ണ സൂര്യഗ്രഹണം ഉണ്ടാകുമെന്ന സോഷ്യല്മീഡിയാ പ്രചാരണത്തിന്റെ സത്യാവസ്ഥ വെളിപ്പെടുത്തി ശാസ്ത്രലോകം. അന്ന് ഒരു ഗ്രഹണവും ദൃശ്യമാകില്ലെന്ന് ജ്യോതിശാസ്ത്രജ്ഞര് സ്ഥിരീകരിച്ചു.
അടുത്ത പൂര്ണ്ണ സൂര്യഗ്രഹണം 2027 ഓഗസ്റ്റ് 2 ലായിരിക്കുമെന്ന് അവര് പറയുന്നു. അതും ഇന്ത്യയില് ദൃശ്യമാവില്ല. 6 മിനിറ്റും 23 സെക്കന്ഡും വരെ നീണ്ടുനില്ക്കുമെന്ന് പ്രവചിക്കപ്പെടുന്ന അപൂര്വവും അതിശയകരവുമായ ആ ഗ്രഹണം യൂറോപ്പ്, വടക്കേ ആഫ്രിക്ക, മിഡില് ഈസ്റ്റ് എന്നിവിടങ്ങളില് ദൃശ്യമാകും. 1991 നും 2114 നും ഇടയില് കരയില് നിന്ന് ദൃശ്യമാകുന്ന ഏറ്റവും ദൈര്ഘ്യമേറിയ പൂര്ണ്ണ സൂര്യഗ്രഹണമായിരിക്കും അതെന്ന് സ്പേസ് ഡോട്ട് കോമിനെ ഉദ്ധരിച്ച് വാര്ത്താ ഏജന്സികള് വ്യക്തമാക്കുന്നു.
