ലഖ്നൗ: പെണ്കുട്ടികളെ ലവ് ജിഹാദിലൂടെ മതമൗലികവാദികളാക്കുന്ന 10 പേരടങ്ങുന്ന സംഘത്തെ വിവിധ സംസ്ഥാനങ്ങളില് നിന്നും പിടികൂടി ഉത്തര്പ്രദേശ് പൊലീസ്. 33ഉം 18ഉം വയസ്സുപ്രായമുള്ള രണ്ട് പെണ്കുട്ടികളുടെ തിരോധാനം സംബന്ധിച്ച അന്വേഷണത്തില് നിന്നാണ് പെണ്കുട്ടികളെ ലവ് ജിഹാദില് കൂടുക്കിയ ശേഷം മതമൗലികവാദികളാക്കുന്ന സംഘം പ്രവര്ത്തിക്കുന്നുണ്ടെന്ന് കണ്ടെത്താന് സാധിച്ചത്. ആഗ്ര പൊലീസ് കമ്മീഷണര് ദീപക് കുമാറാണ് ഇങ്ങിനെ ഒരു സംഘം പ്രവര്ത്തിക്കുന്നതായി കണ്ടെത്തിയത്.
” ഈ സംഘത്തിനുള്ള പണം വരുന്നത് യുഎസില് നിന്നും കാനഡയില് നിന്നുമാണെന്ന് അന്വേഷണത്തില് കണ്ടെത്തി.” ആഗ്ര പൊലീസ് കമ്മീഷണര് ദീപക് കുമാര് പറഞ്ഞു. രാജസ്ഥാനില് നിന്നും പിടികൂടിയ മുഹമ്മദ് അലി ആണ് ഇക്കാര്യങ്ങള് വെളിപ്പെടുത്തിയത്. അലി നേരത്തെ ഹിന്ദുവായിരുന്നു. പീയൂഷ് പന്വാര് എന്നായിരുന്നു ഇയാളുടെ പേര്. പിന്നീടാണ് ഇയാള് മുസ്ലിമായി പരിവര്ത്തനം ചെയ്തത്. ഇയാള് ഈ ഗ്യാങ്ങിലെ അംഗമായിരുന്നു. ഇസ്ലാമിലേക്ക് മതം മാറിയതിന് മാതാപിതാക്കള് തന്നോടുള്ള ബന്ധം ഉപേക്ഷിച്ചെന്നും തെറ്റ് മനസ്സിലായെന്നും ഹിന്ദുമതത്തിലേക്ക് തന്നെ തിരിച്ചുപോകുമെന്നും അലി പൊലീസിനോട് പറയുന്നു.
കുറ്റകൃത്യം തുടങ്ങുന്നത് മുഹമ്മദ് അലിയില് നിന്നും
പിയൂഷ് പന്വാര് എന്ന രാജസ്ഥാന് യുവാവ് മുഹമ്മദ് അലിയായ കഥ രസകരമാണ്. ഷന എന്ന മുസ്ലിം പെണ്കുട്ടിയെ പ്രേമിച്ച പിയൂഷ് പന്വാര്, ഷന പറഞ്ഞതനുസരിച്ചാണ് മുഹമ്മദ് അലി എന്ന പേര് സ്വീകരിച്ച് മുസ്ലിമായത്. ഇതോടെ മുഹമ്മദ് അലിയുമായുള്ള ബന്ധം വീട്ടുകാര് ഉപേക്ഷിച്ചു. ഇയാള് മതം മാറിയതോടെ ഷന മുഹമ്മദ് അലിയെ ഉപേക്ഷിക്കുകയും ചെയ്തു. പിന്നീട് മുഹമ്മദ് അലി ഉത്തര്പ്രദേശില് എത്തി ഒരു മുസ്ലിം പെണ്കുട്ടിയെ വിവാഹം കഴിച്ചു.
പോപ്പുലര് ഫ്രണ്ട് നേതാവുമായി ബന്ധം
പിന്നീടാണ് മുഹമ്മദ് അലി പോപ്പുലര് ഫ്രണ്ടിന്റെ നേതാവ് മുഹമ്മദ് ഗോസുമായി പരിചയപ്പെടുന്നത്. മുഹമ്മദ് ഗോസ് ഇയാള്ക്ക് കലീം സിദ്ദിഖി എന്ന മുസ്ലിം മത പണ്ഡിതനെ പരിചയപ്പെടുത്തിക്കൊടുത്തു. പിന്നീട് മുഹമ്മദ് അലിയെ മുസ്ലിം മതപണ്ഡിതന് ബംഗാളിലേക്ക് മതപഠനത്തിന് അയച്ചു. അസന്സോള്, ബര്ദ്ദമാന് തുടങ്ങിയ മതപഠനശാലയില് ഇയാള് പ്രവര്ത്തിച്ചു. ഒരു വര്ഷം മുന്പ് ഗോവയിലെ അയിഷ എന്ന പെണ്കുട്ടിയുമായി ഇന്സ്റ്റഗ്രാമില് പരിചയത്തിലായി. അയിഷയും ഈ 10 പേരടങ്ങുന്ന ലവ് ജിഹാദ് സംഘത്തില്പ്പെട്ട യുവതിയാണ്.
സംഘത്തെ കുടുക്കിയത് യുപി പൊലീസിന്റെ മിഷന് അസ്മിത
യുപി പൊലീസിന്റെ മിഷന് അസ്മിത എന്ന ദൗത്യമാണ് ഇവരെ കുടുക്കിയത്. അനധികൃതമായി പ്രവര്ത്തിക്കുന്ന സിന്ഡിക്കേറ്റുകളെ തകര്ക്കുന്ന ദൗത്യമാണിത്. ജയ് പൂരില് വെച്ച് അറസ്റ്റിലായ മുഹമ്മദ് അലി പറഞ്ഞത് പോപ്പുലര് ഫ്രണ്ടിലേയും എസ് ഡിപിഐയിലേയും അംഗങ്ങളും ഈ ശൃംഖലയില് കണ്ണികളാണെന്നാണ്. രാജസ്ഥാനില് നിന്നും ജുനൈദ് ഖുറേഷി എന്നയാളെയും അറസ്റ്റ് ചെയ്തിരുന്നു. ബംഗാളില് നിന്നും ഹസന് അലി, ഒസാമ എന്നിവരെ പിടികൂടി.
യുപിയിലെ ആഗ്രയില് നിന്നും റഹ്മാന് ഖുറേഷിയെ അറസ്റ്റ് ചെയ്തു. യുപിയെ മുസഫര്ബാദില് നിന്നും അബു താലിബിനെയും അറസ്റ്റ് ചെയ്തു. ഉത്തരാഖണ്ഡിലെ ഡെറാഡൂണില് നിന്നും അബ്ദുള് റഹ്മാന്, ദല്ഹിയില് നിന്നും മുസ്തഫ എന്നിവരെയും അറസ്റ്റ് ചെയ്തു.
