കൊല്ലം: മിഥുന്റെ മരണത്തിന് കാരണമായവരില് പ്രധാന പങ്ക് കെഎസ്ഇബിക്കാണ്. അപകടം ഇനിയും ഒരു ജീവന് കൂടി കവരാതിരിക്കാന് കെഎസ്ഇബിയുടെ കണ്ണുകള് അടിയന്തരമായി തുറക്കേണ്ട സ്ഥലമാണ് പടിഞ്ഞാറെകല്ലട നെല്പ്പുരക്കുന്ന് ഗവ.എച്ച്എസ്എസ് സ്കൂള് വളപ്പിനുള്ളില് വലിയ ട്രാന്സ്ഫോര്മര് വര്ഷങ്ങളായി അപകടഭീഷണി പരത്തുകയാണ്.
ചുറ്റുമുള്ള സുരക്ഷാവേലിയാണെങ്കില് തുരുമ്പിച്ച് നാശവുമായി. വള്ളിപ്പടര്പ്പുകള് കയറിയ ട്രാന്സ്ഫോര്മര് മിഥുന് സംഭവത്തിന്റെ പശ്ചാത്തലത്തിലാണ് വൃത്തിയാക്കിയത്. പടിഞ്ഞാറെകല്ലട നെല്പ്പുരക്കുന്നിലെ ഈ സ്കൂളില് ആയിരത്തിലധികം കുട്ടികളാണ് പഠിക്കുന്നത്. വിദ്യാര്ത്ഥികള് ഓടുകയും കളിക്കുകയും ചെയ്യുന്ന സ്ഥലത്ത് 11 കെവി വൈദ്യുതിലൈനും ട്രാന്സ്ഫോര്മറും സ്ഥാപിച്ചതിലെ ബുദ്ധിശൂന്യതയാണ് ഇപ്പോള് ചോദ്യം ചെയ്യപ്പെടുന്നത്.
തേവലക്കര ബോയ്സ് ഹൈസ്കൂളിന് ആറുകിലോമീറ്റര് അകലെ മാത്രമാണ് നെല്പ്പുരക്കുന്ന സ്കൂളിന്റെ പ്രവര്ത്തനം. സ്കൂള് കെട്ടിടങ്ങള്ക്ക് മധ്യഭാഗത്തായി ഹൈസ്കൂള് ക്ലാസ് മുറികളോടു ചേര്ന്നാണ് ഈ ട്രാന്സ്ഫോര്മറുള്ളത്. ഇതിനുമുകളിലായാണ് 11 കെവി ലൈന് കടന്നുപോകുന്നത്. ഇതിന് തൊട്ടടുത്തായി വിദ്യാര്ത്ഥികള് ഉപയോഗിക്കുന്ന കിണറും ശുചിമുറിയുമുണ്ട്. കല്ലടയാറിന് കുറുകെ കിഴക്കേ കല്ലട പ്രദേശത്തേക്കുള്ള 11 കെവി ലൈനുകളാണ് സ്കൂളിലൂടെ കടന്നുപോകുന്നത്.
