കാസര്കോട് : നിരവധി പേരുടെ ബാങ്ക് അക്കൗണ്ടുകളില് നിന്ന് എ.ടി.എം കാര്ഡും മൊബൈല് നമ്പറും കൈക്കലാക്കി പണം തട്ടിയ കേസില് ഒന്നാം പ്രതിയായ യുവതിയെ മുംബൈ വിമാനത്താവളത്തില് നിന്ന് പൊലീസ് അറസ്റ്റ് ചെയ്തു. കാസര്കോട് തളങ്കര സ്വദേശിനി സാജിത (34) ആണ് പിടിയിലായത്. 2024 മാര്ച്ച് മുതലുള്ള പല ദിവസങ്ങളിലായി ബാങ്ക് അക്കൗണ്ടില് നിന്ന് സൈബര് തട്ടിപ്പിലൂടെ പണം കൈക്കലാക്കിയെന്ന ഒരു സ്ത്രീയുടെ പരാതിയിലാണ് ആദ്യം കേസ് രജിസ്റ്റര് ചെയ്തതെങ്കിലും കൂടുതല് പേരെ ഇവര് തട്ടിപ്പിനിരയാക്കിയിട്ടുണ്ടെന്ന് അന്വേഷണത്തില് വ്യക്തമായിരുന്നു. കേസെടുത്തതറിഞ്ഞ് വിദേശത്തേക്ക് കടന്ന പ്രതികളില് സാജിത തിരികെ നാട്ടിലേക്കു വരും വഴിയാണ് വിമാനത്താവളത്തില് നിന്ന് അറസ്റ്റിലായത്. ഇവര്ക്കെതിരെ ലുക്ക് ഔട്ട് നോട്ടീസ് പുറത്തിറക്കിയിരുന്നു. മുംബൈ വിമാനത്താവള അധികൃതര് ഇവരെ തിരിച്ചറിഞ്ഞ് തടഞ്ഞുവയ്ക്കുകയും കാസര്കോട് സൈബര് പൊലീസിനെ അറിയിക്കുകയുമായിരുന്നു. രണ്ടാം പ്രതി കാസര്കോട് മുട്ടത്തൊടി സ്വദേശി മുഹമ്മദ് സാബിറിനെ (32) പിടികൂടാനുണ്ട്.
