ന്യൂദല്ഹി: ബ്രഹ്മോസ് താണ്ഡവത്തില് ഭയന്ന പാകിസ്ഥാന് പുതിയ മിസൈല് മുന്നറിയിപ്പുകളുമായി ഇന്ത്യ. വെറും 24 മണിക്കൂര് സമയത്തിനകത്ത് മൂന്ന് ആധുനിക മിസൈലുകളാണ് ഇന്ത്യ പരീക്ഷിച്ചത്. ഇതില് അഗ്നി1, പൃഥ്വി2, ആകാശ് പ്രൈം എന്നിവ.
ജൂലായ് 16,17 തീയതികളിലായാണ് ഇന്ത്യയുടെ തന്ത്രപരവും സാങ്കേതിക കരുത്തും വിളിച്ചോതുന്ന മൂന്ന് മിസൈലുകള് 24 മണിക്കൂറിനകം പരീക്ഷിച്ചത്. സമുദ്രനിരപ്പില് നിന്നും 15000 അടി ഉയരത്തില് അതിവേഗതയില് കുതിയ്ക്കുകയായിരുന്ന രണ്ട് ഡ്രോണുകളെ കൃത്യമായി ആകാശ് പ്രൈം മിസൈല് അടിച്ചിട്ടു. ലഡാക്കില് നടന്ന പരീക്ഷണത്തിന്റെ ഭാഗമായിട്ടായിരുന്നു ഈ ദൗത്യം. ഓപ്പറേഷന് സിന്ദൂറില് ഉപയോഗിച്ച ആകാശ് മിസൈല് സംവിധാനത്തിന്റെ പരിഷ്കരിച്ച സംവിധാനമാണ് പുതിയ ആകാശ് പ്രൈം. ജൂലായ് 16നാണ് ആകാശ് പ്രൈം പരീക്ഷിച്ചത്. ഇതിന്റെ വീഡിയോ പ്രതിരോധമന്ത്രി രാജ്നാഥ് സിങ്ങ് സമൂഹമാധ്യമത്തില് പങ്കുവെച്ചിരുന്നു. ഓക്സിജന് കുറഞ്ഞ, കൂടുതല് കാറ്റുള്ള കടുത്ത കാലാവസ്ഥയിലും കൃത്യമായി ആകാശ് പ്രൈം പ്രവര്ത്തിച്ചു. കരയില് നിന്നും ആകാശത്തേക്ക് തൊടുക്കാവുന്നവയാണ് ആകാശ് പ്രൈം. യുദ്ധവിമാനങ്ങള്, ക്രൂയിസ് മിസൈലുകള്,ഡ്രോണുകള് എന്നിവയെ ചെറുക്കുന്നതാണ് ആകാശ് പ്രൈം. ഇതില് ഘടിപ്പിച്ച രാജേന്ദ്ര റഡാര് ശത്രുനീക്കങ്ങള് കൃത്യമായി മുന്കൂട്ടി രേഖപ്പെടുത്താന് കഴിവുള്ളതാണ്. ഇന്ത്യയുടെ അതിര്ത്തിയിലെ പര്വ്വതപ്രദേശങ്ങളിലാണ് ആകാശ് പ്രൈം വിന്യസിക്കുക.
ജൂലായ് 17നാണ് അഗ്നി 1, പൃഥ്വി2 എന്നീ മിസൈലുകള് പരീക്ഷിച്ചത്. ഒഡിഷയിലെ ചന്ദിപൂര് മേഖലയിലാണ് ഇവ രണ്ടും പരീക്ഷിച്ചത്. ഹ്രസ്വദൂര ബലിസ്റ്റിക് മിസൈലുകളാണ് ഇവ. ദ്രവ ഇന്ധനത്തില് പ്രവര്ത്തിക്കുന്ന പൃഥ്വി2 കിറുകൃത്യതയോടെ 350 കിലോമീറ്റര് വരെ അകലെയുള്ള ലക്ഷ്യസ്ഥാനങ്ങളെ അടിച്ചിടാന് കഴിവുള്ള മിസൈലാണ്. അഗ്നി 1 ആകട്ടെ 700 കിലോമീറ്റര് അകലെയുള്ള ലക്ഷ്യസ്ഥാനങ്ങളെ തകര്ക്കും. ഈ രണ്ട് മിസൈലുകള്ക്കും ആണവസ്ഫോടകവസ്തുക്കള് വരെ വഹിക്കാന് സാധിക്കും.
ഓപ്പറേഷന് സിന്ദൂറിന്റെ അനുഭവപാഠങ്ങളില് നിന്നും ഈ മിസൈലുകള്
ഓപ്പറേഷന് സിന്ദൂറില് ഇന്ത്യയുടെ ആകാശ് മിസൈല് സംവിധാനം ചൈനയുടെയും തുര്ക്കിയുടെയും ഡ്രോണുകളെ അടിച്ചിട്ടിരുന്നു. പക്ഷെ ഓപ്പറേഷന് സിന്ദൂറിന്റെ അനുഭവം ഉള്ക്കൊണ്ട് ഇന്ത്യന് സൈനിക മേധവികള് നല്കിയ നിര്ദേശങ്ങള് ഉള്ക്കൊണ്ടാണ് ആകാശ് പ്രൈം, പൃഥ്വി2, അഗ്നി1 എന്നീ മൂന്ന് മിസൈലുകളും പരിഷ്കരിച്ചിരിക്കുന്നത്. പാകിസ്ഥാന് തുര്ക്കിയില് നിന്നും പുതിയ ഡ്രോണുകള് വാങ്ങുന്നതോടെ അവയെ നേരിടാന് ആകാശ് പ്രൈം, പൃഥ്വി2, അഗ്നി1 എന്നീ മൂന്ന് മിസൈലുകള്ക്കാകും. ഓപ്പറേഷന് സിന്ദൂറില് നിന്നുള്ള പാഠങ്ങള് ഉള്ക്കൊണ്ട്, ഇന്ത്യയുടെ സൈനികമേധാവികളുടെ നിര്ദേശമനുസരിച്ചാണ് ആകാശ് പ്രൈം, പൃഥ്വി2, അഗ്നി1 എന്നീ ഈ മൂന്ന് മിസൈലുകള് പരിഷ്കരിച്ചിരിക്കുന്നത്. മൂന്ന് മിസൈലുകളുടെ ഈ പരിഷ്കരിച്ച പതിപ്പുകളിലൂടെ പ്രതിരോധരംഗത്ത് പുതിയ ഉയരങ്ങള് കീഴടക്കിയിരിക്കുകയാണ് ഇന്ത്യ.കൂടുതല് ഉയര്ന്ന ആകാശവിതാനങ്ങളില് കൃത്യതയോടെ ലക്ഷ്യം നിര്വ്വഹിക്കുന്ന മിസൈലുകള് എന്നതായിരുന്നു സൈന്യത്തിന്റെ ആവശ്യം.
