തിരുവനന്തപുരം: കര്ക്കടക വാവ് ബലിതര്പ്പണത്തിന് ഏകീകൃത ഫീസ് നിശ്ചയിക്കുമെന്നും ഇതിനായി ദേവസ്വം ബോര്ഡിനെ ചുമതലപ്പെടുത്തിയിട്ടുണ്ടെന്നും ദേവസ്വം മന്ത്രി വി എന് വാസവന് പറഞ്ഞു. ബലിതര്പ്പണത്തിന് ഇക്കൊല്ലം ദേവസ്വം ബോര്ഡ് കൂടുതല് വിപുലമായ ക്രമീകരണങ്ങള് ഏര്പ്പെടുത്തും.
മുന് വര്ഷത്തെപ്പോലെ പരാതികളില്ലാത്ത ബലിതര്പ്പണ വേദികള് ഒരുക്കുകയാണ് ഇത്തവണയും ലക്ഷ്യം. ഇതിനായി എല്ലാ ക്രമീകരണങ്ങളും സമയബന്ധിതമായി പൂര്ത്തിയാക്കണം. തിരുവല്ലം ക്ഷേത്രത്തിന് സമീപം സ്വകാര്യ വാഹനങ്ങള് പാര്ക്ക് ചെയ്യുന്നത്കൊണ്ടുള്ള ബുദ്ധിമുട്ടുകള് പരിഹരിക്കാന് പോലീസും മോട്ടോര് വാഹന വകുപ്പും ഇടപെടണം.
ശംഖുമുഖത്ത് മത്സ്യബന്ധനവുമായി ബന്ധപ്പെട്ട ബോട്ടുകള് മാറ്റുന്ന വിഷയത്തില് ഫിഷറീസ് വകുപ്പുമായി ബന്ധപ്പെട്ട് നടപടി സ്വീകരിക്കും. സുരക്ഷാ ക്രമീകരണങ്ങള്ക്കുള്ള സംവിധാനം ഫയര് ആന്ഡ് റെസ്ക്യൂ വകുപ്പ് ഒരുക്കണം. ആവശ്യമായ ഇടങ്ങളില് സ്കൂബ സംഘങ്ങളെയും ലൈഫ് ഗാര്ഡുകളെയും പോലീസിനെയും വിന്യസിക്കണം. ആരോഗ്യ വകുപ്പിന്റെ മൊബൈല് ടീമും സി.പി.ആര്. സൗകര്യങ്ങളോടുകൂടിയ പ്രധാനപ്പെട്ട സെന്ററും ബലിതര്പ്പണ പരിസരത്ത് ഉറപ്പാക്കണമെന്നും മന്ത്രി നിര്ദ്ദേശിച്ചു.
