ന്യൂഡല്ഹി: ഇതിഹാസചലച്ചിത്രകാരന് സത്യജിത്ത് റേയുടെ കുടുംബ വീട് പൊളിക്കരുതെന്ന ഇന്ത്യയുടെ ആവശ്യത്തിനു വഴങ്ങി ബംഗ്ലാദേശ് സര്ക്കാര്. മൈമന്സിംഗിലെ പുരാതനമായ വീട് പൊളിക്കുന്നത് ഖേദകരമാണെന്നും പുനരുദ്ധാരണത്തിന് സഹായം നല്കാമെന്നും ഇന്ത്യ വ്യക്തമാക്കിയിരുന്നു. ഇതേത്തുടര്ന്ന് വീട് സംരക്ഷിക്കുമെന്ന് ബംഗ്ലാദേശ് ഹൈക്കമ്മീഷന് പ്രസ് മിനിസ്റ്റര് ഫൈസല് മഹമൂദ് അറിയിച്ചു. പഴക്കം മൂലം കെട്ടിടം അപകട ഭീഷണിയിലാണെന്നും അതിനാലാണ് പൊളിച്ചു കളഞ്ഞ് പുതിയതു പണിയാന് ചില്ഡ്രണ്സ് അക്കാദമി നീക്കം നടത്തിയയെന്നും അദ്ദേഹം പറഞ്ഞു. വിഷയത്തില് ഇന്ത്യ ഇടപെട്ടതോടെ സര്ക്കാര് ഇടപെട്ട് കെട്ടിടം പൊളിക്കുന്നത് തടഞ്ഞിട്ടുണ്ട്. പുനരുദ്ധാരണ പ്രവര്ത്തനങ്ങള് നടത്താന് ആര്ക്കിയോളജി വകുപ്പും ജില്ലാ ഭരണകൂടവും തീരുമാനിച്ചിട്ടുണ്ടെന്നും ഇന്ത്യയുടെ സഹായം തേടേണ്ടതുണ്ടോ എന്നതില് ഉടന് തീരുമാനമെടുക്കുമെന്നും ഫൈസല് മഹമൂദ് അറിയിച്ചു.
