ന്യൂദല്ഹി: ഇന്ത്യയുടെ വ്യോമയുദ്ധത്തിന് കരുത്തേകാന് യുഎസ് നിര്മ്മിതമായ ആകാശത്തിലെ യുദ്ധകഴുകനായ അപ്പാച്ചെ യുദ്ധഹെലികോപ്റ്ററുകളുടെ ആദ്യ ബാച്ച് ജൂലായ് 21ന് എത്തും. അപ്പാച്ചെ ഗാര്ഡിന് എന്ന് കൂടി വിളിക്കപ്പെടുന്ന എഎച്ച് -64ഇ എന്ന വിഭാഗത്തില്പ്പെടുന്ന ഇത് ആകാശയുദ്ധത്തില് ആധുനികമായ ഒരു യുദ്ധഹെലികോപ്റ്ററാണ്. യുദ്ധക്കരുത്തിനെ ആധുനികമാക്കാനുള്ള ഇന്ത്യന് സേനയുടെ ശ്രമത്തില് വലിയൊരു നാഴികക്കല്ലായി മാറും അപ്പാച്ചെ യുദ്ധഹെലികോപ്റ്ററുകളുടെ ഈ വരവ്.
ആറ് അപ്പാച്ചെകള്, ചെലവ് 5150 കോടി രൂപ
മൂന്ന് അപ്പാച്ചെകളാണ് ആദ്യം എത്തുന്നത്. ഈ വര്ഷം അവസാനത്തോടെ അവശേഷിക്കുന്ന മൂന്ന് അപ്പാച്ചെകള് കൂടി എത്തും. ട്രംപിന്റെ 2020ലെ ഇന്ത്യാസന്ദര്ശനകാലത്ത് ഒപ്പുവെച്ച കരാര് പ്രകാരമാണ് അപ്പാച്ചെകള് എത്തുന്നത്. ഇപ്പോഴത്തെ ഡോളര്മൂല്യം വെച്ച് കണക്കാക്കിയാല് ഏകദേശം 5150 കോടി രൂപയുടെ കരാറാണിത്.
യുപിയിലെ ഗസിയാബാദിലെ.ഹിന്ഡൊണ് എയര്ബേസിലേക്ക്
വ്യോമസേനയുടെ ഹിന്ഡോണ് എയര്ബേസില് എത്തുന്ന അപ്പാച്ചെ ആദ്യബാച്ചിനെ പാകിസ്ഥാന് അതിര്ത്തിപ്രദേശത്ത് വിന്യസിക്കും. ജോധ്പൂരിനടുത്തുള്ള ഡെസര്ട്ട് മേഖലയിലായിരിക്കും അപ്പാച്ചെ വിമാനങ്ങളെ വിന്യസിക്കുക. ഉയര്ന്ന തീവ്രതയോടുകൂടിയ യുദ്ധമേഖലകളില് നല്ല വ്യോമപിന്തുണ നല്കാന് അപ്പാച്ചെകള്ക്ക് സാധിക്കും.
ശത്രുവിന് നേരെ ശക്തമായി വെടിയുതിര്ക്കുന്നതിലും ശത്രുവില് നിന്നുള്ള ആക്രമണത്തെ അതിജീവിക്കുന്നതിലും സംയോജിത ശൃംഖലാ ആക്രമണദൗത്യങ്ങളിലും മികവാര്ന്ന പ്രകടനം പുറത്തെടുക്കുന്ന യുദ്ധവിമാനമാണ് അപ്പാച്ചെ ഗാര്ഡിയന്. ആധുനിക സെന്സറുകള്, സോഫ്റ്റ് വെയറുകള്, ആധുനിക ആയുധസംവിധാനം എന്നിവ ഒരു ബഹുതല ആക്രമണത്തിന് പറ്റിയ യുദ്ധവിമാനമാക്കി അപ്പാച്ചെ ഗാര്ഡിയനെ മാറ്റുന്നു.
ഡ്രോണുകളുമായി ഒത്തു ചേര്ന്ന് പ്രവര്ത്തിക്കുന്ന അപ്പാച്ചെ
ആളില്ലാതെ പറക്കുന്ന ആകാശ വാഹനങ്ങളായ ഡ്രോണുകള്, ലോയിറ്ററിംഗ് മ്യൂനീഷന് എന്നിവയുമായി ചേര്ന്ന് പ്രവര്ത്തിക്കുനുള്ള കഴിവും ആധുനികയുദ്ധതന്ത്രം മെനയുന്നതില് അപ്പാച്ചെയെ വിലമതിക്കാനാകാത്ത ആയുധമാക്കി മാറ്റുന്നു. അതിനാല് ഇന്ത്യയുടെ ഡ്രോണ് ആക്രമണങ്ങള്ക്ക് കരുത്തേകാന് അപ്പാച്ചെയ്ക്ക് സാധിക്കും. വാര്ത്താവിനിമയത്തിനുള്ള അപ്പാച്ചെയുടെ കഴിവ് ആരെയും അതിശയിപ്പിക്കും. ഭൂമിയില് നിലകൊള്ളുന്ന കരസൈനികരുമായും മറ്റ് യുദ്ധകേന്ദ്രങ്ങളുമായി ഇടമുറിയാതെ വിവരങ്ങള് കൈമാറാന് അപ്പാച്ചെയ്ക്ക് കഴിയുമെന്നത് എല്ലാവരേയും സംയോജിപ്പിച്ച് ശത്രുവിനെതിരെ മുന്നേറ്റം നടത്താന് സഹായകരമാകും.
ബുള്ളറ്റുകള്ക്ക് മുറിപ്പെടുത്താന് സാധിക്കാത്ത അപ്പാച്ചെ
ചെറിയ വെടിയുണ്ടകള്ക്കും ഷെല്ലാക്രമണങ്ങള്ക്കും അപ്പാച്ചെയെ വീഴ്ത്താന് കഴിയില്ല. വെടികൊണ്ടാലും പ്രശ്നമില്ലാതെ പറക്കാന് അപ്പാച്ചെയ്ക്ക് സാധിക്കും. ബുള്ളറ്റ് പ്രൂഫ് ജാക്കറ്റുണ്ടാക്കുന്ന ബോറോണ് കാര്ബൈഡ് വസ്തുകൊണ്ടാണ് അപ്പാച്ചെയുടെ ബോഡി എന്നതിനാല് ബുള്ളറ്റുകള്ക്ക് തുളയ്ക്കാന് പാടാണ്. കൃത്യതയോടെ ശത്രുപാളയത്തില് പതിക്കുന്നതിന് വഴികാട്ടുന്ന സംവിധാനങ്ങളോടുകൂടിയ ആകാശത്ത് നിന്നും ഭൂതലത്തിലേക്ക് അയയ്ക്കാവുന്ന മിസൈലുകള് വഹിക്കാനും അപ്പാച്ചെയ്ക്ക് സാധിയ്ക്കും.
സാഹചര്യം മനസ്സിലാക്കിക്കൊടുക്കാനുള്ള സംവിധാനങ്ങളുള്ളതിനാല് പൈലറ്റിന് അതിവേഗം പ്രവര്ത്തിക്കാന് സാധിക്കും. ലോംഗ് ബോ റഡാര് സംവിധാനങ്ങളും ശത്രുപക്ഷത്തെ നീക്കങ്ങള് പൈലറ്റിനെ അപ്പപ്പോള് അറിയിക്കും.
1200 റൗണ്ട് വെടിയുതിര്ക്കുന്ന ചെയിന് ഗണ്, ഹെല്ഫയര് മിസൈലുകള്
അപ്പാച്ചെയില് മൂന്ന്തരം ആയുധങ്ങള് ഘടിപ്പിക്കാം. 30എംഎം എം230 ചെയിന് ഗണ്, 70 എംഎം റോക്കറ്റുകള്, ഹെല്ഫയര് മിസൈലുകള് എന്നിവ അപ്പാച്ചെയില് ഘടിപ്പിക്കാനാവും. ചെയിന് ഗണ്ണിന് 1200 റൗണ്ട് വെടിവെയ്ക്കാന് സാധിക്കും.
വേഗതയാണ് അപ്പാച്ചെ യുദ്ധയുദ്ധഹെലികോപ്റ്ററുകളുടെ മറ്റൊരു ആകര്ഷകത്വം. മണിക്കൂറില് 248 കിലോമീറ്റര് വേഗതയില് പറക്കാന് സാധിക്കുമെന്നതിനാല് ശത്രുആയുധങ്ങളെ വെട്ടിച്ചുപറക്കാനും പൊടുന്നനെ കുതിച്ചുചെന്ന് ശത്രുലക്ഷ്യങ്ങളെ ചാമ്പലാക്കാനും അപ്പാച്ചെയ്ക്ക് സാധിക്കും.
