ബെംഗളൂരു: ധര്മ്മസ്ഥലയിലെ കൂട്ടക്കൊലപാതകത്തെക്കുറിച്ച് വ്യാജ എഐ വീഡിയോ ചെയ്തെന്ന് ആരോപിച്ച് യൂട്യൂബര് സമീറിനെ പൊലീസ് അറസ്റ്റ് ചെയ്തു. ഈ കേസില് പരാതിയുമായി മുന്നോട്ട് വന്ന ആള് പറഞ്ഞതിനേക്കാള് ഭയപ്പെടുത്തുന്ന രീതിയില് ധര്മ്മസ്ഥല കൂട്ടക്കൊലപാതകങ്ങളെക്കുറിച്ച് എഐ സഹായത്തോടെ വീഡിയോ സൃഷ്ടിച്ചു എന്ന കുറ്റത്തിന്റെ പേരിലാണ് സമീര് എം.ഡി. എന്ന യൂട്യൂബറെ അറസ്റ്റ് ചെയ്തതെന്ന് ദക്ഷിണ കന്നഡ ജില്ല പൊലീസ് മേധാവി അരുണ് കെ പറഞ്ഞു.
നൂറുകണക്കിന് പേരെ ധര്മ്മസ്ഥലയില് ചിലരുടെ നിര്ദേശപ്രകാരം കുഴിച്ചുമൂടി എന്നാണ് അവിടെ ജോലി ചെയ്തിരുന്ന ശുചീകരണത്തൊഴിലാളി വെളിപ്പെടുത്തിയതെങ്കിലും അതിനുമപ്പറും ഈ സംഭവത്തെ പെരുപ്പിച്ച് കാണിക്കുന്ന രീതിയിലായിരുന്നു സമീറിന്റെ യൂട്യൂബില് പങ്കുവെച്ച വീഡിയോ എന്നാണ് പൊലീസ് പറയുന്നത്. ഏകദേശം രണ്ട് കോടിയിലധികം പേര് ഈ വീഡിയോ കണ്ടിരുന്നു.
ഭാരത ന്യായസംഹിത പ്രകാരം 192, 240, 353(1)ബി എന്നീ വകുപ്പുകള് പ്രകാരണമാണ് സമീര് എം.ഡി. യ്ക്ക് എതിരെ കേസെടുത്തിരിക്കുന്നത്. താന് കുഴിച്ചിട്ട ശവശരീരങ്ങളില് സ്കൂള് വിദ്യാര്ത്ഥികളും ബലാത്സംഗത്തിനിരയായ യുവതികളും പെണ്കുട്ടികളും ഉണ്ടെന്നാണ് ഈ ശുചീകരണത്തൊഴിലാളി വെളിപ്പെടുത്തിയത്. രണ്ട് യുവ അഭിഭാഷകരാണ് ഈ സംഭവം പുറത്തെത്തിച്ചത്. ഇവരാണ് ഈ ശുചീകരണത്തൊഴിലാളി പറഞ്ഞ കഥ ഉന്നത പൊലീസുദ്യോഗസ്ഥരിലേക്കും മാധ്യമങ്ങളിലേക്കും എത്തിച്ചത്.
ധര്മ്മസ്ഥലയിലെ ക്ഷേത്രത്തെക്കുറിച്ച് മോശമായ ചിത്രങ്ങള് സൃഷ്ടിച്ച് പങ്കുവെച്ച ഫെയ്സ്ബുക്ക് പേജുകള്ക്കെതിരെയും പൊലീസ് നടപടിയെടുത്തിട്ടുണ്ട്.
