തിരുവനന്തപുരം: വിജിലന്സ് ഓഫീസര് എന്ന വ്യാജേന വിവാഹ വാഗ്ദാനം നല്കി യുവതിയെ പീഡിപ്പിച്ച ആളെ വിളപ്പില്ശാല പൊലീസ് അറസ്റ്റ് ചെയ്തു. പത്തനംതിട്ട തിരുവല്ല കുറവന്കുഴി സ്വദേശി അഭിലാഷ് ചന്ദ്രന് (40) ആണ് പിടിയിലായത്. വിളപ്പില്ശാല സ്റ്റേഷന് പരിധിയില് താമസിച്ച് വന്നിരുന്ന കോട്ടയം സ്വദേശിനി വിധവയെ ആണ് വിവാഹ വാഗ്ദാനം നല്കി പീഡിപ്പിച്ചത്.
ഭാര്യയുമായി വിവാഹ ബന്ധം വേര്പ്പെടുത്തിയെന്നും വിജിലന്സ് ഉദ്യോഗസ്ഥന് ആണെന്നും യുവതിയെ വിശ്വസിപ്പിച്ചാണ് പീഡിപ്പിച്ചത്. യുവതിയെയും മക്കളെയും നോക്കിക്കൊള്ളാം എന്ന് വാഗ്ദാനം നല്കി യുവതി വാടകയ്ക്കെടുത്ത വീട്ടില് ഒപ്പം താമസിച്ച പ്രതി യുവതിയെ ദേഹോപദ്രവം ഏല്പ്പിക്കുകയും അസഭ്യം പറയുകയും പതിവായിരുന്നു. പിന്നീട് എറണാകുളം വിജിലന്സ് ഓഫിസിലേക്ക് സ്ഥലം മാറ്റമായെന്ന് പറഞ്ഞ് മുങ്ങി.
തിരുവല്ല പുല്ലാട് ഭാഗത്ത് ഒളിവില് കഴിഞ്ഞ പ്രതിയെ ഫോണ് കോളുകള് നിരീക്ഷിച്ചും വിവരങ്ങള് ശേഖരിച്ചും പിടികൂടുകയായിരുന്നു പൊലീസ്. കോടതിയില് ഹാജരാക്കി പ്രതിയെ റിമാന്ഡ് ചെയ്തു.
